विजय लोखंडे
वाघोली: पूर्व हवेलीतील राजकीयदृष्ट्या महत्वपूर्ण समजल्या जाणाऱ्या लोणीकंद गावच्या सरपंचपदी मोनिका श्रीकांत कंद यांची बिनविरोध निवड झाली. त्यामुळे जिल्हा परिषदेचे माजी अध्यक्ष तथा जिल्हा बँकेचे संचालक प्रदीप कंद यांच्या कुटुंबात पाचव्यांदा सरपंचपद आले आहे.
लोणीकंदच्या सरपंच प्रियांका योगेश झुरुंगे यांनी सरपंच पदाचा राजीनामा दिल्याने दरम्यानच्या कालावधीत उपसरपंच राहुल शिंदे यांनी प्रभारी सरपंचपदाचा कार्यभार सांभाळला. त्यानंतर अतिरिक्त तहसीलदारांच्या आदेशानुसार लोणीकंद ग्रामपंचायतीच्या सरपंचपदाची निवडणूक मंडलधिकारी संदीप झिंगाटे यांच्या अध्यक्षतेखाली घेण्यात आली. यामध्ये मोनिका कंद यांचा एकमेव उमेदवारी अर्ज आल्याने निवडणूक निर्णय अधिकारी झिंगाटे यांनी त्यांची सरपंचपदी बिनविरोध निवड झाल्याचे जाहीर केले.
यावेळी पदाधिकारी व ग्रामस्थांच्या वतीने नवनिर्वाचित सरपंच मोनिका कंद यांचा सन्मान पार पडला. यावेळी बाजार समितीचे माजी सभापती नारायणराव कंद, उपसभापती रवींद्र कंद, माजी सरपंच श्रीकांत कंद, माजी सरपंच अनिल होले ,माजी उपसरपंच गजानन कंद, संतोष झुरुंगे, माजी सरपंच लक्ष्मीताई कंद, लीना कंद, सुलोचना झुरुंगे, प्रियांका झुरुंगे, माजी उपसरपंच राहुल शिंदे, ग्रामपंचायत सदस्य सुधीर कंद, गौरव झुरंगे, सागर कंद, आशिष गायकवाड, नंदकुमार कंद, ओंकार कंद, अतुल मगर, सरस्वती दळवी, डॉ.सोनाली जगताप, दीपाली राऊत, सुप्रिया कंद, कावेरी कंद, सुजाता कंद, सोमेश्वर महिला पतसंस्थेच्या अध्यक्षा पूजा कंद आदी उपस्थित होते.
समाजकारणाला प्राधान्य देत लोणीकंद गावच्या विकासावर लक्ष केंद्रित करणार असून वरिष्ठांच्या मार्गदर्शनाखाली, ग्रामपंचायत कार्यकारिणी व सर्व संबंधित घटकांच्या सहयोगातून नागरी हितासाठी पिण्याचे शुद्ध पाणी, कचरा व्यवस्थापन,तसेच दर्जेदार रस्ते आदींसह विविध विकासकामे करण्याचा प्रयत्न करणार आहे.
– मोनिका कंद, सरपंच-ग्रामपंचायत लोणीकंद
