–अक्षय टेमगिरे
रांजणगाव गणपती : शिरूर विधानसभा मतदारसंघासाठी राष्ट्रवादी काँग्रेस पक्ष अजित पवार व महायुतीचे उमेदवार ज्ञानेश्वर उर्फ माऊली कटके यांनी शक्ती प्रदर्शन केले. त्यानंतर ढोल ताशाच्या गजरात व गगनभेदी घोषणा देत आपला उमेदवारी अर्ज माजी खासदार शिवाजीराव आढळराव पाटील यांच्या उपस्थितीत दाखल केला आहे.
आज (मंगळवारी) सकाळी वाघोली येथे वाघेश्वराचे दर्शन घेऊन महायुती व राष्ट्रवादी काँग्रेस पक्ष अजित पवार यांचे उमेदवार ज्ञानेश्वर उर्फ माऊली कटके यांनी शिरूर बाजार समिती आवारातील छत्रपती शिवाजी महाराज पुतळ्यास व भारतरत्न डॉक्टर बाबासाहेब आंबेडकर पुतळ्यास पुष्पहार घालून भव्य रॅली काढली होती.
या रॅलीला मोठा उत्साह मतदार व सर्वसामान्य कार्यकर्त्यांनी दाखवला. शिरूर बाजार समिती आवारातून निघालेली रॅली शिरूर पाच कंदील चौक येथे जाहीर सभेमध्ये परिवर्तित झाली. याच वेळी मोजक्या कार्यकर्त्यास राष्ट्रवादी काँग्रेस पक्षाचे उमेदवार ज्ञानेश्वर उर्फ माऊली कटके यांनी शिरूर तहसील कार्यालय येथे आपला उमेदवार अर्ज दाखल केला.
यावेळी गोडगंगाचे संचालक दादा पाटील फराटे, राहुल पाचर्णे, रविंद्र काळे, महेश ढमढरे, भगवान शेळके, रामभाऊ सासवडे, अरुण गिरे, नवनाथ काकडे, राजेंद्र जासूद, स्वप्निल गायकवाड, सुधीर फराटे उपस्थित होते.
शिरूर विधानसभेमध्ये वाघोली येथील वाहतूक कोंडीचा प्रश्न, यशवंत सहकारी साखर कारखाना सुरू करण्याचा प्रयत्न करणार, घोडगंगा सहकारी साखर कारखाना सुरू करून, औद्योगिक वसाहती स्थानिक तरुणांना नोकरीत प्राधान्य देण्यासाठी प्रयत्न करणारा आहे. असे सांगून सरकारने केलेली लाडकी बहीण योजना, शेतकऱ्यांची वीज आणि बिल माफी हे प्रमुख विषय घेऊन निवडणुकीला सामोरे जात असल्याचे कटके यांनी सांगितले.
