Lalit Patil case : पुणे : ससून रूग्णालयातून पलायन केलेला ड्रग्ज तस्कर ललित पाटील याला अटक झाल्यानंतर अनेक धक्कादायक बाबी उघडकीस येत आहेत. या प्रकरणात आता पुणे पोलीस दलातील नाथा काळे आणि अमित जाधव या दोन पोलीस कॉन्स्टेबलना अटक करण्यात आली आहे.
ललित पाटील हा पुण्यातील ससुन रुग्णालयातून १ ऑक्टोबर रोजी पळून गेला होता. त्यावेळी ससून रुग्णालयातील कैद्यांसाठीच्या १६ नंबर वॉर्डबाहेर हे दोन पोलीस कॉन्स्टेबल पहारा देत होते. कर्तव्यात कसूर केल्याच्या आरोपावरून या दोन पोलीस कॉन्स्टेबल्सना अटक करण्यात आली आहे. ललित पाटील प्रकरणात आतापर्यंत अटक केलेल्या या दोन पोलीस कॉन्स्टेबलसह दहा पोलिसांना निलंबित करण्यात आले आहे.
दरम्यान, ललित पाटील ससून रूग्णालयातून ड्रग्ज रॅकेट चालवत होता. त्याला सहकार्य करणाऱ्या व चौकशीत दोषी आढळलेले ससून हॉस्पिटलचे डीन डॉक्टर संजीव ठाकूर यांना पदमुक्त करुन पूर्वीच्या डीनची फेरनियुक्ती करण्यात आली आहे. ठाकूर यांच्या विभागीय चौकशीचे आदेश देण्यात आले आहेत. तर आर्थोपेडीक सर्जन डॉक्टर प्रविण देवकाते चौकशी यांचे निलंबन करण्याचे आदेश देण्यात आले आहेत. या दोन्ही डॉक्टरांवर पोलीस काय कारवाई करतात, याकडे सगळ्यांचे लक्ष आहे.
ललित पाटीलचा ससून रुग्णालयातील मुक्काम वाढावा यासाठी त्याला डॉक्टर ठाकूर यांची मदत होत होत असल्याचे आता स्पष्ट झाले आहे. डॉक्टर ठाकूर यांच्या सांगण्यावरून डॉक्टर प्रवीण देवकाते हे ललित पाटील आजारी असल्याचे खोटे रिपोर्ट तयार करत होते. या दोन्ही डॉक्टरांचे हे कृत्य वैद्यकीय व्यवसायाला अनुसरून नसल्याने त्यांच्यावर कारवाई झाली आहे. दरम्यान, डॉक्टर संजीव ठाकूर ससून रुग्णालयाचे डीन म्हणून दहा महिन्यांपूर्वी रुजू झाले. ललित पाटील ससून रुग्णालयात डिसेंबर २०२० पासून ठाण मांडून होता. त्यामुळे डॉक्टर ठाकूर यांच्या आधीचे डीन आणि अधिकार्‍यांची चौकशी करा. संजीव ठाकूर यांच्यावरची कारवाई म्हणजे धूळफेक असल्याची टीका आमदार रवींद्र धंगेकर आणि शिवसेना नेत्या सुषमा अंधारे यांनी केली आहे.
दरम्यान, ससूनचे पूर्वीचे डीन डॉक्टर विनायक काळे यांची मुदतीआधी बदली केली होती. या निर्णयाविरोधात डॉक्टर काळे यांनी मॅटमध्ये दाद मागितली होती. मॅटने डॉक्टर काळे यांच्या बाजूने निकाल दिला. यामुळे या पदावर त्यांची फेरनियुक्ती झाली आहे. डॉक्टर ठाकूर यांना पदमुक्त करण्या आले आहे.
