दीपक खिलारे
इंदापूर : महाराष्ट्र राज्य तंत्रशिक्षण मंडळाअंतर्गत आंतरअभियांत्रिकी डिप्लोमा विद्यार्थी क्रीडा संघटना, महाराष्ट्र राज्य पुणे विभाग यांच्या वतीने घेण्यात आलेल्या कबड्डी स्पर्धेत विद्या प्रतिष्ठान पॉलिटेक्निक कॉलेज, इंदापूर संघाने अजिंक्यपद पटकावले.
विद्या प्रतिष्ठान पॉलिटेक्निक कॉलेज इंदापूर संघाने, यशोदा कॉलेज ऑफ फार्मसी, सातारा या संघावर २२-१३ असे गुण घेऊन विजय मिळवला. ही स्पर्धा दिनांक ४ फेब्रुवारी रोजी यशोदा टेक्निकल कॅम्पस, सातारा येथे पार पडली.
या स्पर्धेत महेंद्र चितळकर या खेळाडूने ५ सुपर रेड करून संघाला विजय मिळवून दिला. कर्णधार सुजल निंबाळकर, प्रीतम शेंडे, समाधान चव्हाण यांनी संघाच्या विजयात मोलाचा वाटा उचलला.
या स्पर्धेत पुणे जिल्ह्यातून एकूण १५ संघ सहभागी झाले होते. संघ व्यवस्थापक लक्ष्मीकांत लाकाळ व मार्गदर्शक ज्ञानदेव धुमाळ यांनी संघाच्या यशामध्ये महत्त्वपूर्ण भूमिका बजावली. महाविद्यालयाचे प्राचार्य डॉ. सुजय देशपांडे यांनी विजयी संघाचे अभिनंदन केले.
