लोणी काळभोर : भरदिवसा लोणी रेल्वे स्टेशनकडे जाणाऱ्या हॉटेलच्या बाहेर गांजा विक्री करणाऱ्या दोघांना दरोडा व वाहन चोरी विरोधी पथकाने रंगेहाथ पकडले आहे. याप्रकरणी दोघांवर लोणी काळभोर पोलीस ठाण्यात गुन्हा दाखल करण्यात आला असून यातील एकाला अटक केली आहे. त्यांच्याकडून पोलिसांनी 5 हजार 540 रुपयांचा 277 ग्रॅम गांजा जप्त केला आहे.
अमिरखान सुधाखान पठाण (वय 45), शेरखान पठाण (दोघे रा. बिसमिल्ला हॉटेलचे समोर, लोणी रेल्वे स्टेशन गेट जवळ, लोणी काळभोर) असे गुन्हा दाखल करण्यात आलेल्या दोघांची नावे आहेत. यातील अमिरखान पठाण याला अटक करण्यात आली असून शेरखान पठाण हा अद्याप फरार आहे. याप्रकरणी दरोडा व वाहन चोरी विरोधी पथकाचे पोलीस हवालदार गणेश गोसावी यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, पुणे – सोलापूर महामार्गावरील लोणी स्टेशन चौकातून रेल्वे स्टेशनकडे जाणाऱ्या रस्त्यावर आरोपी अमिरखान पठाण व शेरखान पठाण हे स्वत:चे आर्थिक फायद्याकरीता बेकायदेशीरपणे काही नागरिकांना गांजा विक्री करीत असल्याची माहिती पोलिसांना मिळाली होती. त्यानुसार दरोडा व वाहन चोरी विरोधी पथकाने छापा टाकला असता अमिरखान पठाण आढळून आला तर शेरखान पठाण पळून जाण्यात यशस्वी झाला.
दरम्यान, पोलिसांनी अमिरखान पठाण याला अटक केली असून त्याच्याकडून पोलिसांनी 5 हजार 540 रुपयांचा 277 ग्रॅम गांजा जप्त केला आहे. तपास लोणी काळभोर पोलीस ठाण्यातील पोलीस उपनिरीक्षक अनिल जाधव करीत आहेत.
