पुणे : कबाब वेळेत न दिल्याने झालेल्या वादातून हॉटेल मालकाकडून ग्राहकाला बेदम मारहाण करण्यात आल्याचा प्रकार रविवारी (दि. २७) लष्कर परिसरात घडला. याप्रकरणी हॉटेल मालकासह दोघांविरुद्ध लष्कर पोलिसांनी गुन्हा दाखल केला आहे. या मारहाणीमध्ये जाकीर हुसेन पठाण (वय ४०, रा. एच. एम. रॉयल सोसायटी, कोंढवा बुद्रुक) जखमी झाले. याप्रकरणी हॉटेल मालक शाहबाज नवाब शेख (वय ४४, रा. रेडियन पॅरेडाईज बिल्डिंग, वानवडी) व कर्मचारी मोहंमद अयाज शेख (वय २४, रा. जमादार गल्ली, मंचर, आंबेगाव) यांच्याविरुद्ध गुन्हा दाखल करण्यात आला.
लष्कर भागातील शाही दावत या हॉटेलमध्ये पठाण चिकन कबाब घेण्यासाठी गेले होते. कबाब तयार होण्यास उशीर झाल्याने त्यांनी हॉटेलमधील कर्मचाऱ्यांकडे विचारणा केली. त्यावरून त्यांची वादावादी झाली. त्यावेळी शाहबाज व मोहंमद यांनी पठाण याला बेदम मारहाण केली. लष्कर पोलीस याप्रकरणी तपास करीत आहेत.
