“हवेलीत मोजणीचं काम, अन् पत्रासाठी दोन वर्षं थांब”; काय आहे उरुळी कांचन येथील प्रकरण…वाचा सविस्तर

संदीप बोडके 

लोणी काळभोर, ता. 3 : जमीन मोजणीसाठी ‘अतितातडी’ प्रकारातून शासकीय तिजोरीत रक्कम जमा करुन दोन वर्षं पूर्ण झाली आहेत. तरीही मोजणी नकाशांचे पोट हिश्यांचे पत्रच अद्याप तयार केले नसल्याचा धक्कादायक प्रकार हवेली तालुक्यातील मोजणी कार्यालयात घडला आहे. शेतकऱ्याला तब्बल दोन वर्षे हेलपाटे मारूनही अद्याप न्याय मिळालेला नाही. “हवेलीत मोजणीचं काम, अन् पत्रासाठी दोन वर्षं थांब” असे म्हणत शेतकऱ्याने आपली हतबलता “पुणे प्राईम न्यूज” शी बोलताना व्यक्त केली आहे. त्यामुळे हवेली भूमि अभिलेखचे उपअधीक्षक अमर पाटील शेतकऱ्यांना आता तरी विलंब न लावता न्याय देणार का?  याकडे नागरिकांचे लक्ष लागले आहे.

काही महिन्यांपूर्वी महसूलमंत्री चंद्रशेखर बावनकुळे यांनी भूमि अभिलेख विभागातील कामकाजाबाबत प्राप्त तक्रारीवरून अधिकाऱ्यांना चांगल्याच कानपिचक्या दिल्या होत्या. मात्र, हवेली तालुक्यातील मोजणी कार्यालय महसूल मंत्र्यांनी दिलेले आदेश अंमलात आणताना दिसत नाही. दिरंगाईचा अति गलथान कारभार हवेली भूमी अभिलेख कार्यालयात सुरु आहे.

मौजे उरुळी कांचन येथील गट नबंर 1223 ची अतितातडी पोट हिस्स्यांची मोजणी (रजिस्टर नबंर 866/2023) जानेवारी 2023 मध्ये झालेली आहे. संबंधित पोट हिस्सा मोजणीची “क” प्रत नकाशा मार्च 2023 मध्ये मिळाला आहे. त्याबाबत गट नबंरमधील हिस्सेदाराच्या कोणत्याही प्रकारच्या तक्रारी नाहीत. मात्र, याला दोन वर्षं पूर्ण झाल्यानंतरही सातबारावर पोटहिस्सा करण्याबाबतचे पत्रच हवेलीच्या मोजणी कार्यालयाने अद्याप तयार केले नसल्याचे समोर आले आहे.

दरम्यान, हे ‘कजाप’चे पत्र का व कशासाठी तयार केले नाही, याबाबत वेगवेगळ्या चर्चा सुरू आहेत. मात्र या ‘कजाप’च्या पत्रकापोटी शेतकऱ्यांना दोन वर्षे हवेलीच्या मोजणी कार्यालयाने वेठीस धरले आहे.

मावळचा न्याय हवेलीला लागू होणार का?

दफ्तर तपासणीमध्ये दिरंगाई व शासकीय कर्तव्यात अनियमितता आढळल्याने मावळ तालुक्यातील परिरक्षक भूमापकाचे निलंबन झाले आहे. तसेच भूमापकाच्या कार्यालयीन कार्यविवरणावर देखरेख ठेवण्याची जबाबदारी उपअधिक्षकांची असल्याने संबधित उपअधिक्षकांची विभागीय चौकशी करण्याचे आदेश भूमि अभिलेखचे पुणे येथील उपसंचालक राजेंद्र गोळे यांनी जारी केले आहेत. त्याच धर्तीवर हवेली तालुक्यात ‘कजाप’चे पत्र देण्यास दोन वर्षं लावणाऱ्या संबंधित कर्मचारी व अधिकाऱ्यांची चौकशी होणार का ? हा प्रश्न यानिमित्ताने समोर येत आहे.

याबाबत बोलताना हवेली भूमि अभिलेख मुख्यालयाचे सहाय्यक विजय साबळे म्हणाले की, सदर प्रकरणात तांत्रिक अडचण असू शकते. मात्र, संबधित कार्यालयात त्याची योग्य माहिती मिळू शकते.

हवेली तालुका भूमीअभिलेख उपअधीक्षक अमर पाटील यांच्याशी संपर्क केला असता ते म्हणाले की, उरुळी कांचन येथील ‘कजाप’चे काय प्रकरण आहे, ते पहिल्यांदा पाहतो. त्यानंतर अधिक माहिती देतो.

याबाबत बोलताना भूमापक अमोल कदम म्हणाले की, या प्रकरणाबाबत माहिती या आगोदरच मिळालेली आहे. त्याच्यावर काम सुरु आहे. सध्या मी उरुळी कांचन परिसरात काम करीत आहे. दोन दिवसात अर्जदाराला ‘कजाप’चे पत्र देण्यात येईल.