वाघोली: हवेली तालुक्यातील वाघोली परिसरात एक रिक्षा चोरीची घटना समोर आली आहे. प्रवासादरम्यान चालक लघुशंकेला थांबल्यानंतर अंधाराचा फायदा घेऊन अनोळखी प्रवासी रिक्षासह पसार झाल्याची घटना वाघोली-भावडी रोड येथे सोमवारी (ता. ०५) रात्री ११ अकरा वाजण्याच्या सुमारास घडली आहे. याप्रकरणी रिक्षाचालक अमर साळुंके यांनी लोणीकंद पोलीस ठाण्यात फिर्याद दिली आहे. त्यानुसार अज्ञात चोरट्याविरोधात गुन्हा दाखल केला आहे.
मिळालेल्या माहितीनुसार, भावडी येथील रिक्षाचालक अमर साळुंखे सोमवारी रात्री अकरा वाजण्याच्या सुमारास घरी जात असताना वाघोली परिसरातील पाच नंबर चौक येथे अनोळखी प्रवाशाने वाघेश्वर चौकात सोडण्यास सांगितले. प्रवाशाला बसवून पुढे जात असताना सुयोगनगर व पाच नंबर चौकादरम्यान रोडच्या कडेला रिक्षा लावून अंधारात चालक लघुशंकेसाठी थांबला.
दरम्यान, तो पुन्हा आला असता रिक्षा घेऊन रिक्षातील प्रवाशी पसार झाल्याचे दिसले. रिक्षाचालकाने वाघोली व परिसरात रिक्षाचा शोध घेतला असता रिक्षा मिळून आली नाही. याबाबत अनोळखी प्रवाशावर गुन्हा दाखल करण्यात आला आहे. तपास लोणीकंद पोलीस करीत आहेत.
