पुणे : पुणे पोर्श अपघात प्रकरणात राज्य सरकार आणि पोलीस योग्य कारवाई करत आहेत. आम्ही सारखे कॅमेऱ्यासमोर येत नाही, याचा अर्थ आम्ही लपवाछपवी करत आहोत, कुणाला तरी पाठिशी घालत आहोत असा होत नाही. विरोधकांनी काय आरोप करायचे हा त्यांचा अधिकार आहे. मात्र, ही घटना घडल्यापासून जे जे दोषी आहेत त्यांच्यावर कारवाई झाली आहे, असं अजित पवार म्हणाले.
पुढे बोलताना म्हणाले, पोर्श अपघात प्रकरणात ससून रुग्णालयातील डॉक्टरही दोषी आढळले आहेत. त्यांच्यावरही कारवाई झाली अल्पवयीन मुलाच्या नावाने कोणाच्या रक्ताचे नमुने पुढे करण्यात आले होते, याची चौकशी करण्यात येते आहे. अपघात घडला तेव्हा हसन मुश्रीफ परदेशात होते. ससून रुग्णालय त्यांच्या वैद्यकीय शिक्षण खात्याच्या कक्षेत येते. त्यांनीही संबंधितांच्या चौकशीचे आदेश दिले.
उत्पादन शुल्क खात्याचे मंत्री शंभूराज देसाई यांनीही आपल्या खात्याल सूचना दिल्या आहेत. एकूणच हे प्रकरण सगळ्यांनी गांभीर्याने घेतले आहे. रोज तपास पुढे सरकत आहे, दोषींवर कारवाई केली जात आहे. आधी मुलाला अटक झाली नव्हती, त्याला नंतर अटक करण्यात आली. त्यानंतर मुलाच्या बापाला, बापाच्या बापालाही अटक करण्यात आली आहे. त्यामुळे या प्रकरणात सरकार कोणतीही लपवाछपवी करत नाही, असे अजित पवार यांनी सांगितले.
कल्याणीनगर अपघात प्रकरणात पुणे पोलीस आयुक्तांना फोन केल्याचा आरोप अजित पवारांवर करण्यात आला होता, त्याबाबत बोलताना अजित पवार म्हणाले, पुणे पोलीस आयुक्तांना मी कायमच फोन करतो. पुण्यातल्या अपघातानंतर दोषींवर योग्य कारवाई करा असे मी त्यांना सांगितले होते. जिल्ह्याचा पालकमंत्री म्हणून ते माझं कामच आहे असं अजित पवार म्हणाले.
