हडपसर : पुणे सासवड मार्गावरून भरधाव वेगाने चाललेल्या एका कंटेनरने दुचाकीला धडक दिल्याची घटना घडली आहे. ही घटना हडपसर बस स्टॉप जवळ असलेल्या ग्लायडिंग सेंटर समोर बुधवारी (ता.20) रात्री सव्वा आठ वाजण्याच्या सुमारास घडली आहे. या अपघातात दुचाकीस्वाराचा जागीच मृत्यू झाला आहे. तर हडपसर पोलिसांनी कंटेनर चालकाला अटक केली आहे.
अनिल नामदेव खळदकर (वय 42,रा.मु. कुंभारवळण पो. खळद ता. पुरंदर जि. पुणे) असे मृत्यू झालेल्याचे नाव आहे. तर महादेव मोहन कवटेकर (वय 34, रा. गुंजूंटी, ता. उंबरगा, जि. धाराशिव उस्मानाबाद) असे अटक करण्यात आलेल्या चालकाचे नाव आहे. याप्रकरणी राकेश वाघ (वय 34, रा. हडपसर पुणे) यांनी हडपसर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, अनिल खळदकर हे त्यांच्या जुपीटर मोपेड या दुचाकीवरून चालले होते. तर आरोपी महादेव कवटेकर हा कंटेनर घेऊन भरधाव वेगाने चालले होते. तेव्हा कंटेनर व जुपीटर चा ग्लायडिंग सेंटर समोर बुधवारी (ता.20) रात्री सव्वा आठ वाजण्याच्या सुमारास जोरदार अपघात झाला. या अपघातात अनिल खळदकर हे गंभीर जखमी होऊन त्यांचा मृत्यू झाला.
वाहतुकीच्या नियमांकडे दुर्लक्ष करून अनिल खळदकर यांच्या मृत्यूस कारणीभूत ठरल्याप्रकरणी कंटेनर महादेव कवटेकर यांच्यावर हडपसर पोलीस ठाण्यात गुन्हा दाखल करण्यात आला आहे. पुढील तपास हडपसर पोलीस ठाण्याच्या सहाय्यक पोलीस निरीक्षक हसीना शिकलगार करीत आहेत.
