थेऊर, (पुणे) : विविध रंगी फुलांनी सजलेले अष्टविनायक तीर्थक्षेत्रापैकी प्रख्यात धार्मिक स्थळ म्हणून प्रसिद्ध असलेल्या थेऊर (ता. हवेली) येथे संकष्टी चतुर्थीला श्री चिंतामणी मंदिरात सोमवारी (ता. 17) भाविकांनी दर्शनासाठी मोठ्या प्रमाणात गर्दी केली होती. चंदनाचा लेप लावलेल्या स्वयंभू मुर्तीला हारतुऱ्यांची सजावट, धुप अत्तराचा दरवळत असलेला सुंगध यातून ‘गणपती बाप्पा मोरया, मंगलमूर्ती मोरया’च्या जयघोषात चिंतामणीच्या दर्शनासाठी हजारो भाविक दाखल झाले होते. फाल्गुन महिन्यातील संकष्टी चतुर्थी असल्याने पहाटेपासूनच भाविकांनी चिंतामणीच्या दर्शनासाठी गर्दी केली होती.
पहाटे आगलावे बंधु यांच्या हस्ते श्री चिंतामणीची महापूजा करण्यात आली. यावेळी विश्वस्त केशव उमेश विद्वांस उपस्थित होते. चिंचवड देवस्थानच्या वतीने श्री चिंतामणीची महापूजा करण्यात आली. देवस्थान तर्फे मंदिर प्रांगणात मंडप घालण्यात आला होता. थेऊर परिसरात लोणी काळभोर पोलिसांचा बंदोबस्त ठेवण्यात आला होता. ग्रामपंचायतीतर्फे पार्किंगची व्यवस्था करण्यात आली होती. दुपारी देवस्थान तर्फे भाविकांना उपवासाच्या खिचडीचे वाटप करण्यात आले. मंदिर परिसरातील दुकाने व हॉटेल्स ग्राहकांनी गजबजले होते.
उष्णतेमुळे भाविकांची गैरसोय होऊ नये म्हणून मंदिर परिसरात जागोजागी मोठे कूलर लावण्यात आले होते. सायंकाळी चिंतामणी भजनी मंडळ यांच्या साथीने शिवशंभू चरित्रकार ह.भ.प.तुकाराम (महाराज) घाडगे, आळंदी यांचे सुभाष्य कीर्तन झाले. चंद्रोदयानंतर श्रींचा छबिना काढण्यात आला. त्यांनतर उपस्थित भाविकांना ग्रामस्थांतर्फे महाप्रसाद देण्यात आला. जास्त गर्दी होण्याची शक्यता असल्याने देवस्थान तर्फे जादा सुरक्षा व्यवस्था करण्यात केली होती. देवस्थानचे विश्वस्त केशव उमेश विद्वांस लक्ष ठेवून होते.
