लोणी काळभोर : इमारतीच्या दुसऱ्या मजल्यावर अचानक भीषण आग लागल्याची धक्कादायक घटना घडली आहे. ही घटना कदमवाकवस्ती (ता. हवेली) ग्रामपंचायत हद्दीतील संभाजीनगर परिसरात गुरुवारी (ता. १) मध्यरात्री बारा वाजण्याच्या सुमारास घडली आहे. अर्ध्या तासाच्या अथक प्रयत्नानंतर आगीवर नियंत्रण मिळविण्यात स्थानिक नागरिकांना यश आले आहे. सुदैवाने या आगीत कोणतीही जीवितहानी झाली नसली तरी घरातील सामानाचे मोठ्या प्रमाणात नुकसान झाले आहे.
मिळालेल्या माहितीनुसार, संभाजीनगर परिसरात अंकित हाईट्स या नावाने इमारत आहे. या इमारतीमध्ये दुसऱ्या मजल्यावर राहुल मोहन गायकवाड यांच्या मालकीचा 14 नंबर हा फ्लॅट आहे. गायकवाड यांनी हा फ्लॅट भाडेतत्वावर रामदास शिंदे यांना दिला होता. रामदास शिंदे हे कुटुंबासोबत त्यात राहत होते. दरम्यान, गुरुवारी (ता. १) मध्यरात्री बारा वाजण्याच्या सुमारस गॅस गिझरमध्ये शॉर्टसर्किट झाल्याने आग लागली होती. आग लागल्यानंतर नागरिकांची धावपळ सुरु झाली. तर काही नागरिकांनी पाण्याच्या सहाय्याने अर्ध्या तासाच्या अथक प्रयत्नानंतर आग आटोक्यात आणली.
या घटनेची माहिती मिळताच, लोणी काळभोर पोलीस ठाण्याचे सहाय्यक पोलीस निरीक्षक शशिकांत खोसे, पोलीस अंमलदार मनोहर गोरवे, बिभीषण कुंटेवाड तातडीने घटनास्थळी दाखल झाले. तेव्हा इमारतीला लागलेली आग विझली होती. त्यानंतर पोलिसांनी घटनास्थळाचा पंचनामा केला. पुढील तपास लोणी काळभोर पोलीस करीत आहेत.
