लोणी काळभोर, (पुणे) : पुणे- सोलापूर महामार्गावर कुंजीरवाडी ग्रामपंचायत हद्दीतील आळंदी म्हातोबाची गावाकडे जाणाऱ्या चौकात टँकरने दिलेल्या धडकेत एका ३५ वर्षीय महिलेचा जागेवरच मृत्यू झाल्याची घटना नुकतीच घडली आहे. तर एका मुलीच्या डोक्याला दुखापत झाल्याची घटना बुधवारी सकाळी आठ वाजण्याच्या सुमारास घडली आहे.
योगिता राजकुमार गव्हाणे, (वय- ३५, रा. होले कॉम्प्लेक्स, उरुळी कांचन, ता. हवेली) असे अपघातात जागेवरच मृत्यू झालेल्या महिलेचे नाव आहे. तर सुरेखा राजकुमार गव्हाणे (वय- १६,) असे अपघातात जखमी झालेल्या मुलीचे नाव आहे. तिच्यावर कुंजीरवाडी येथील एका खाजगी रुग्णालयात उपचार सुरू आहेत.
मिळालेल्या माहितीनुसार, योगिता व सुरेखा हा मायलेकी आहेत. बुधवारी सकाळी लवकर रोजच्या प्रमाणे योगिता या दुचाकीवरून शेवाळेवाडी या ठिकाणी कामाला निघाल्या होत्या. तर त्यांची मुलगी ही त्यांच्याबरोबर निघाली होती.
पुण्याकडे जात असताना आठ वाजण्याच्या सुमारास नायगाव चौकात पाठीमागून येणाऱ्या एका पेट्रोल डिझेलच्या टँकरने त्यांना पाठीमागून जोरात धडक दिली. यावेळी दुचाकी चालक योगिता गव्हाणे या पुणे सोलापुर महामार्गावर कोसळल्या यामध्ये त्यांच्या डोक्याला जबर मार लागला होता. त्यामुळे त्यांचा जागेवरच मृत्यू झाल्याचे उपस्थित असलेल्या नागरिकांनी सांगितले.
दरम्यान, अपघात झाल्याची माहिती मिळताच अपघातग्रस्त महिला व मुलीला कदम रुग्णवाहिकेचे वैभव कदम, कुंजीरवाडीचे पोलीस पाटील मिलिंद कुंजीर व त्यांच्या सहकाऱ्यांनी तात्काळ रुग्णालयात दाखल केले होते. सदरच्या अपघाताने पुण्याकडे जाणारी वाहतूक ठप्प झाली होती.
