ठाणे : ठाणे जिल्ह्यातील कल्याण परिसरात एका महिलेने घरगुती वादातून चक्क आपल्या पतीला जीवंत जाळून ठार मारण्याचा प्रयत्न केला आहे. हा धक्कादायक प्रकार 8 डिसेंबर रोजी घडला आहे. या प्रकरणी 61 वर्षीय महिलेवर गुन्हा दाखल करण्यात आला आहे. दरम्यान, पतीच्या सेवानिवृत्ती वेतनाच्या पैशांवर डोळा ठेऊन आरोपीनं हे धक्कादायक कृत्य केल्याची प्राथमिक माहिती समोर आली आहे. पीडित सध्या रुग्णालयात दाखल झाला असून, त्याच्यावर वैद्यकीय उपचार सुरु आहेत. (Thane Crime)
जखमी झालेल्या व्यक्तीने दिलेल्या तक्रारीनुसार, आरोपी आणि पीडित यांच्यात पेन्शनच्या पैशांवरुन काही दिवसापासून वाद सुरु आहेत. आरोपी पत्नीला भेटण्यासाठी दोन पुरुष सतत घरी येत होते. त्यामुळे पती-पत्नीमध्ये आणखीनच वाद वाढला होता. या वादाचे स्वरुप पाहता पत्नी आणि इतर दोन व्यक्तींकडून आपल्या जीविताला धोका असल्याची तक्रार पीडिताने पोलिसांमध्ये आगोदरच दिली होती. ( Domestic Dispute)
दरम्यान, दोन तरुण 8 डिसेंबरला घरी येऊन त्याच्या अंगावर ज्वलनशील पदार्थ टाकला. त्यानंतर त्याच्या पत्नीने त्याला पेटवून दिले. आरडाओरडा ऐकून शेजारी मदतीला धावले. त्यांनी पीडिताला वैद्यकीय उपचारासाठी रुग्णालयात दाखल केले. या घटनेची नोंद पोलिसांनी घेतली असून अधिक तपास सुरु आहे.
