मुंबई : शिवसेना आमदारांच्या अपात्रतेच्या निकालाला अवघे तीनच दिवस शिल्लक राहिले आहेत. विधानसभा अध्यक्ष राहुल नार्वेकर हेच निर्णय देणार असून निकालापूर्वीच राहुल नार्वेकर आजारी पडल्याने विरोधकांनी त्यावरून प्रतिक्रिया दिल्या आहेत. विधानसभा अध्यक्षांचं आजारी पडणं हा सुद्धा राजकीय भूकंपाचा भाग असल्याची टीका विरोधकांकडून केली होती.
त्यानंतर आता विधानसभा अध्यक्ष राहुल नार्वेकर वर्षावर दाखल झाल्याची माहिती समोर येत आहे. अचानक राहुल नार्वेकर आणि मुख्यमंत्री एकनाथ शिंदे यांची गुप्त भेट सुरू असल्याने राजकीय वर्तुळात चर्चेला उधाण आलं आहे. या बैठकीत नेमकी काय चर्चा होणार? अशी चर्चा होत आहे.
दरम्यान, विधानसभा अध्यक्ष राहुल नार्वेकर आजारी असूनही वर्षा बंगल्यावर दाखल झाले आहेत. नार्वेकरांनी अचानक मुख्यमंत्र्यांची भेट घेतली. ही गुप्त भेट होती. वर्षा बंगल्यावर फक्त मुख्यमंत्री एकनाथ शिंदे आणि विधानसभा अध्यक्ष राहुल नार्वेकर यांच्यात बैठक सुरू आहे. तिसरा कोणताही नेता यावेळी उपस्थित नाही. यामुळे राजकीय वर्तुळात मोठी खळबळ उडाली आहे. तर या भेटीचे कारण अद्याप गुलदस्त्यात आहे.
10 जानेवारीला आमदार अपात्रतेचा निकाल
येत्या 10 जानेवारीला शिवसेनेच्या आमदारांच्या अपात्रतेचा निकाल येणार आहे. विधानसभा अध्यक्ष राहुल नार्वेकर हेच या निकालाचा निर्णय देणार आहेत. अपात्र आमदारांच्या यादीत मुख्यमंत्री एकनाथ शिंदे यांचाही समावेश आहे. उद्या शिंदे गटाच्या विरोधात निकाल गेला तर शिंदे यांचं मुख्यमंत्रीपद जाऊ शकतं. त्यामुळे राज्यात राजकीय अस्थिरता निर्माण होऊ शकते. त्यापूर्वीच नार्वेकर हे वर्षावर दाखल झाल्याने आश्चर्य व्यक्त केलं जात आहे.
