मुंबई : महाराष्ट्र भारतीय जनता पक्षाकडून देवेंद्र फडणवीस यांचा ट्वीट केलेला व्हिडीओ हा डीलिट करण्यात आला आहे. महाराष्ट्र राज्याच्या नवनिर्मितीसाठी मी पुन्हा येईल, अशा आशयाचा उपमुख्यमंत्रीफडणवीसांचा व्हिडिओ भाजपकडून शेअर करण्यात आला होता. त्यानंतर एक तासाभरासाठी राजकीय वर्तुळात प्रचंड खळबळ माजली. त्यानंतर भारतीय जनता पक्षाकडून हे ट्वीट डीलिट करण्यात आले. पण या प्रकारामुळे भाजप पुन्हा एकदा नव्या राजकीय भूकंपाच्या तयारीत असल्याच्या अशा चर्चा आता रंगू लागल्या आहेत.
दरम्यान सध्या राज्यात महायुतीचं सरकार आहे. यामध्ये मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांचा समावेश आहे. एकनाथ शिंदे यांनी शिवसेनेतून बंड केल्यानंतर तत्कालीन महाविकास आघाडीचं सरकार कोसळलं. त्यावेळी देवेंद्र फडणवीस हेच राज्याच्या मुख्यमंत्री पदी पुन्हा विराजमान होणार असा सर्वांचा अंदाज होता. पण एकनाथ शिंदे यांची मुख्यमंत्री पदी वर्णी लागली आणि चर्चांना पुर्णविराम लागला. पण आता पुन्हा एकदा वर्षभरानंतर चर्चा सुरु झाली आहे.
भाजपकडून स्पष्टीकरण
‘महाराष्ट्र भाजपकडून उपमुख्यमंत्री देवेंद्र फडणवीसांची कविता असलेला व्हिडीओ ट्वीट झाला होता. पण या व्हिडीओचा अर्थ इतकाच की यामुळे कार्यकर्त्यांना यामधून प्रेरणा मिळते. यानंतर कोणताही राजकीय अर्थ काढण्याचा आणि राजकारण करण्याचा प्रयत्न करुन नये. मुख्यमंत्री एकनाथ शिंदे यांच्या नेतृत्वाखाली सरकार काम करेल, असं याआधीच फडणवीसांनी स्पष्ट केलं होतं. त्याचप्रकारे काम केलं जात आहे’, असं स्पष्टीकरण भाजपने दिले आहे.
हा व्हिडीओ अनेकदा पोस्ट
महाराष्ट्र भाजपचे मुख्य प्रवक्ते केशव उपाध्ये यांनी स्पष्टीकरण दिलं. त्यांनी म्हटलं की, ‘हा व्हिडीओ सोशल मीडिया मर्यादित आहे. जनादेश यात्रेतील हा व्हिडीओ आता पर्यत अनेकदा टाकला गेला आहे. त्यातून कार्यकर्त्यांना प्रेरणा मिळत असते.या आधीच माननीय देवेंद्रजीनीच स्पष्ट केले आहे की,एकनाथ शिंदे मुख्यमंत्री हेच मुख्यमंत्री राहतील आणि त्यांच्याच नेतृत्वात आगामी निवडणुका लढविल्या जातील. त्यामुळे कुणीही वेगळा अर्थ काढू नये.’
