योगेश पडवळ
पाबळ, (पुणे) : ‘छत्रपती शिवाजी महाराज की जय, जय भवानी जय शिवाजी, पाऊस पडला गारांचा, सदावर्ते बाराचा, एक वडा, दोन पाव सदावर्ते…’ अशा अनेक घोषणा देत मराठा आरक्षणाला विरोध करणाऱ्या ॲड. गुणरत्न सदावर्ते यांच्या फोटोला जोडे मारून धामणीकरांनी निषेध व्यक्त केला.
धामणी (ता. आंबेगाव) येथे गेल्या तीन दिवसांपासून सुरू असलेल्या साखळी उपोषणाची आज मराठा समाजाविषयी आणि मनोज जरांगे पाटील यांच्याविषयी अपशब्द वापरणाऱ्या गुणरत्न सदावर्ते तसेच मराठा समाजाच्या विषयी अश्लील आणि बेताल वक्तव्य करणाऱ्या किरणकुमार बकाले या पोलीस अधिकाऱ्याचा देखील यावेळी निषेध व्यक्त करण्यात आला.
सदावर्ते यांच्या फोटोला जोडे मारून तसेच पायाखाली तुडवून सकल मराठा बांधवांनी हा निषेध नोंदवला. यावेळी ‘एक मराठा लाख मराठा’च्या घोषणा देण्यात आल्या. तसेच सदावर्तेच्या निषेधार्थ घोषणाबाजी करण्यात आली. तसेच सर्व मराठा बांधवांनी काळ्या फिती बांधून आंदोलनस्थळी उपस्थित राहून सदावर्तेंचा निषेध नोंदवला.
दरम्यान, यावेळी मराठा बांधव मोठ्या संख्येने उपस्थित होते. धामणी, शिरदाळे, पहाडदरा, ज्ञानेश्वरवस्ती येथील अनेक तरुण या आंदोलनात सहभागी झाले असून, दिवसेंदिवस आंदोलनाला पाठिंबा वाढत आहे. तसेच आज सायंकाळी कँडल मार्च काढून जनजागृती करण्यात येणार असून, तेथे देखील मोठ्या संख्येने मराठा बांधव उपस्थित राहणार आहे.
