नवी दिल्ली: पाकिस्तानमधील शाहबाज शरीफ सरकार सतत फील्ड मार्शल असीम मुनीर (Pakistan Army Chief Asim Munir) यांचे अधिकार वाढवत असून, त्यांना नव्याने निर्मित ‘संरक्षण दल प्रमुख’ (CDF) या पदावर औपचारिक नियुक्ती देण्यात आली आहे. या नियुक्तीमुळे पाकिस्तानच्या अण्वस्त्रे व क्षेपणास्त्र तंत्रणांच्या नियंत्रणाची शक्ती आता मुनीर यांच्या हातात केंद्रीत झाली आहे.
गेल्या महिन्यातच हे पद तयार करण्यात आले होते, ज्याचा उद्देश लष्कर, नौदल आणि हवाई दल या तिन्ही दलांमधील समन्वय अधिक मजबूत करणे हा आहे. पंतप्रधान कार्यालयाने जारी केलेल्या निवेदनानुसार, ही नियुक्ती पाच वर्षांसाठी केली गेली आहे. याचबरोबर, हवाई दल प्रमुख एअर चीफ मार्शल झहीर अहमद बाबर यांना दोन वर्षांची मुदतवाढही देण्यात आली आहे.
हेही वाचा: पूनमने एकादशीच्याच दिवशी केले चार खून; नरबळी की तांत्रिक कृत्य? तपासात धक्कादायक खुलासा
फील्ड मार्शल पदावर बढती
मे महिन्यातील ‘ऑपरेशन सिंदूर’मध्ये भारताने पाकिस्तानचा निर्णायक पराभव केल्यानंतर, पाकिस्तानच्या डीजीएमओंना हस्तक्षेप करीत संघर्ष थांबवण्याची विनंती भारताकडे करावी लागली होती. त्यानंतरही असीम मुनीर यांनी पाकिस्तानभर खोटा विजयप्रचार सुरू ठेवला. या घटनाक्रमानंतर शाहबाज शरीफ यांनी त्यांना फील्ड मार्शल पदावर बढती दिली, ज्यामुळे ते प्रत्यक्षात पाकिस्तानचे ‘अनधिकृत राजा’ झाल्याची टीका होत आहे.
‘जॉइंट चीफ्स ऑफ स्टाफ कमिटी’ च्या जागी CDF हे पद
CDF हे पद रद्द झालेल्या ‘जॉइंट चीफ्स ऑफ स्टाफ कमिटी’च्या अध्यक्षांच्या जागी आणले असल्याची माहिती उपलब्ध आहे. राष्ट्रपतींनीही मुनीर यांच्या या नियुक्तीचे कौतुक करत त्यांना शुभेच्छा दिल्या असून, त्यांच्या संमतीमुळे या प्रक्रियेत विलंब होईल अशा अफवांना पूर्णविराम मिळाला आहे. मुनीर यांची 2022 मध्ये लष्करप्रमुख म्हणून नियुक्ती झाली होती, तर 2024 मध्ये त्यांच्या कार्यकाळात पाच वर्षांची वाढ करण्यात आली.
अण्वस्त्र नियंत्रण प्रणालीची सूत्रेही आता त्यांच्या हातात
संरक्षण दल प्रमुख पदामुळे असीम मुनीर यांच्याकडे प्रचंड सत्ता एकवटली आहे. अण्वस्त्रे असलेल्या पाकिस्तानमध्ये या प्रकारचे हे नवे आणि अत्यंत प्रभावी लष्करी पद असून, तीनही सैन्यदलांचे अधिकार आणि नियंत्रण यामुळे एकाच व्यक्तीकडे केंद्रीत झाले आहे. तसेच, देशाच्या अण्वस्त्र नियंत्रण प्रणालीची सूत्रेही आता त्यांच्या हातात आहेत. काही महिन्यांपूर्वीच त्यांना फील्ड मार्शल पदावर बढती देण्यात आली होती, जे पाकिस्तानच्या इतिहासातील फक्त दुसरे उदाहरण आहे. यापूर्वी जनरल अयुब खान यांना हे पद देण्यात आले होते. 1965 च्या भारत-पाकिस्तान युद्धात पराभव पत्करूनही त्यांचे ‘सन्मान’ करण्यात आले होते.
शाहबाज सरकार असीम मुनीर यांच्यावर केलेली ही उदार कृपा अनेकांच्या टीकेचा विषय ठरत आहे. त्यांच्या नेतृत्वाखाली पाकिस्तानच्या सैन्याची आंतरराष्ट्रीय स्तरावर बदनामी होत असतानाही सरकार त्यांना सतत नव्या सत्तास्थानी बसवत असल्याची टीका विरोधकांकडून करण्यात येत आहे.
