बेंगळुरू : बेंगळुरू येथून एक धक्कादायक बातमी समोर आली आहे. एका व्यक्तीने आपल्या पोटच्या १४ वर्षांच्या मुलाला क्रिकेटच्या बॅटने मारहाण करून तसेच डोके भिंतीवर आपटून हत्त्या केल्याची घटना घडली आहे. ही घटना शुक्रवारी १५ नोव्हेंबर रोजी घडली आहे. या घटनेने संपूर्ण परिसरात एकच खळबळ उडाली आहे. याप्रकरणी वडिलांना अटक करण्यात आली आहे.
पोलिसांनी दिलेल्या माहितीनुसार, कुमारस्वामी लेआउट परिसरात एका शाळकरी मुलाचा संशयास्पद मृत्यू झाल्याचा अहवाल पोलिस ठाण्यात आल्यानंतर ही बाब उघडकीस आली आहे. पोलिस घटनास्थळी पोहोचले, त्यावेळी तेथील दृश्य खूप धक्कादायक होते. हत्त्येपूर्वी रवी कुमार याने आपल्या मुलावर अत्याचार तर केला. पण खून लपवण्याचा देखील प्रयत्न केला. मृत मुलाच्या अंत्यसंस्काराची तयारी सुरू होती. मात्र, पोलिसांनी हस्तक्षेप करून मृतदेह ताब्यात घेऊन शवविच्छेदनासाठी पाठविला आहे.
पोस्टमार्टममध्ये झाली वडिलांची क्रूरता उघड
पोस्टमॉर्टमच्या रिपोर्टनुसार, मुलाच्या डोक्यावर गंभीर स्वरूपाच्या जखमा होत्या, तसेच त्याच्या शरीरावर देखील अनेक जखमा होत्या. त्यावरून त्याचा मृत्यू होण्यापूर्वी त्याला क्रूरपणे मारहाण करण्यात आली होती हे स्पष्ट झालं आहे. पोलिस चौकशीत असे समोर आले आहे की, रवी कुमार हा सुतार व्यवसाय करतो. त्याचा मुलगा नववी वर्गात शिकत होता. त्याला अभ्यासात अजिबात रस नव्हता.
दरम्यान, घटनेच्या दिवशी मोबाईल दुरुस्त करण्यावरून किरकोळ वादातून कुमारला मुलाचा राग आला होता. तसेच मोबाईलवर गेम खेळतो म्हणून, त्याने क्रिकेटची बॅट घेऊन तेजसला मारहाण केली. मुलाला मारहाण करून देखील त्याचा राग शांत न झाल्याने आपल्या मुलाचं डोकं भिंतीवर आपटलं आणि म्हणाला, “तू जगलास की मेला याची मला पर्वा नाही. यानंतर मुलगा जमिनीवर कोसळला आणि मोठ मोठ्याने ओरडत राहिला. सकाळी 8 ते दुपारी 2 वाजेपर्यंत त्यांची प्रकृती ढासळत राहिली, परंतु तपासणीनुसार, श्वास थांबल्यानंतरच त्याला रुग्णालयात दाखल करण्यात आले. मात्र, डॉक्टरांनी त्याला मृत घोषित केले.
