पुणे: अजित पवार यांच्या राष्ट्रवादी काँग्रेस पक्षात अंतर्गत नाराजी पुन्हा एकदा उफाळून आली आहे. पक्ष नेत्या रुपाली पाटील यांनी पक्ष बदलाचे स्पष्ट संकेत दिल्यामुळे राजकीय वर्तुळात खळबळ माजली आहे. (Pune Rupali Thombre)
रुपाली पाटील यांनी पक्षातील सध्याची परिस्थिती असमाधानकारक असल्याचे सांगत काही महिलांना अनुभव नसतानाही केवळ नेत्यांच्या पाठोपाठ फिरल्यामुळे पदे मिळत असल्याचा आरोप केला. अशा निर्णयांमुळे निष्ठावान कार्यकर्त्यांचे खच्चीकरण होत असल्याची टीकाही त्यांनी केली.
हेही वाचा: सारंगखेडा बाजार फुलला! अश्व बाजारात घोडे खरेदीसाठी झुंबड; यंदा विक्रम मोडण्याचा अंदाज!
पक्ष सोडण्याचा कोणताही निर्णय घेण्यापूर्वी अजित पवार यांची भेट घेणार असल्याचे पाटील यांनी स्पष्ट केले. दरम्यान, त्यांच्या अलीकडील फेसबुक पोस्टनेही पक्षांतर्गत हालचालींना वेग आला आहे. या पोस्टमध्ये त्यांनी शरद पवार आणि बाळासाहेब ठाकरे यांचे फोटो वापरल्याने त्या शरद पवारांच्या राष्ट्रवादीकडे किंवा शिवसेनेच्या कोणत्याही गटात सामील होऊ शकतात अशी चर्चा सुरू झाली आहे.
रुपाली पाटील यांनी अप्रत्यक्षपणे रुपाली चाकणकर यांच्यावर टीका केल्याचेही बोलले जात आहे. पक्षातील वाढत्या अंतर्गत मतभेदामुळे निर्णय नाईलाजाने घ्यावा लागत असल्याचे त्यांनी सांगितले.
राष्ट्रवादीच्या दोन्ही गटांमध्ये आधीच सुरू असलेल्या राजकीय हालचालींच्या पार्श्वभूमीवर रुपाली पाटील यांची संभाव्य घरवापसी किंवा नवा राजकीय प्रवास कोणत्या दिशेने होईल, याकडे पुणेकरांचे लक्ष लागले आहे.
