Indapur Accident : इंदापूर तालुक्यातून एक धक्कादायक घटना घडली आहे. इंदापूरच्या पिंपळे येथे भिगवण -बारामती राज्य मार्गावर रात्री साडे-दहाच्या सुमारास भीषण अपघात झाला. या अपघातात ऊस वाहतूक करणाऱ्या ट्रॅक्टर आणि ऊस वाहतूक ट्रक यांची धडक झाली. हा ट्रॅक्टर भिगवणकडे जात होता तर ट्रक बारामतीच्या दिशेने येत असताना ही जोरदार धडक झाली. ट्रॅक्टर थेट ट्रकच्या खाली शिरला आणि ट्रॅक्टरचे दोन तुकडे झाले. यात ट्रॅक्टर चालक केबिनमध्ये अडकून पडला. धडकेनंतर ट्रकचाही ताबा सुटून तो रस्त्यावर उलटला. (Pune Accident )
दरम्यान, अपघात इतका भयानक होता की दोन्ही वाहनांनी काही क्षणांतच पेट घेतला. ट्रॅक्टरमध्ये अडकलेल्या चालकाचा जागीच होरपळून मृत्यू झाला. मात्र ट्रक चालक घटनास्थळी आढळला नाही. स्थानिक नागरिकांच्या म्हणण्यानुसार ट्रक चालक बचावासाठी अपघातानंतर पळून गेल्याची माहिती समोर आली आहे.
या भीषण घटनेत ट्रक आणि ट्रॅक्टर दोन्हीही पूर्णपणे जळून खाक झाले आहेत. ट्रकच्या दोन्ही बाजूंनी पेट घेतल्याने ट्रकचेही मोठ्या प्रमाणात नुकसान झाले. घटनेनंतर भिगवण बारामती रोडवर तब्बल दोन तासांपेक्षा जास्त काळ वाहतुकीच्या लांबलचक रांगा लागल्या होत्या.
भिगवण पोलिसांनी आणि अग्निशमन दलाने तत्काळ घटनास्थळी धाव घेत आग आटोक्यात आणली. ट्रॅक्टर चालकाचा दुर्दैवी मृत्यू झाल असून, भिगवण पोलीस ठाण्यात गुन्हा दाखल करण्यात आला आहे. पुढील तपास भिगवण पोलीस करत आहेत.
