लोणी काळभोर : पुणे सोलापूर राष्ट्रीय महामार्गावरील 21 मीटर अंतरावरील अतिक्रमणाला स्थानिक नागरिकांनी कवडी पाट टोलनाक्यावर तीव्र विरोध केला आहे. त्यामुळे नागरिकांच्या विरोधाला प्रशासन नमले असून सध्या एनएचआयच्या हद्दीतील 15 मीटर अंतरावरील अतिक्रमणे काढण्याचा निर्णय झाला आहे. त्यानुसार अतिक्रमण विरोधी कारवाई सुरु झाली आहे. तर उर्वरित पुढील 6 मीटर वरील अतिक्रमणे पुणे महानगर प्रदेश विकास प्राधिकरण नोटीस बजावून लवकरच काढणार आहे. अशी माहिती मिळत आहे.
पुणे-सोलापूर महामार्गावरील कदमवाकवस्ती (ता. हवेली) ग्रामपंचायत हद्दीतील अतिक्रमणे काढण्यास आज बुधवारी (ता.5) दुपारी साडेअकरा वाजण्याच्या सुमारास सुरवात केली. यावेळी स्थानिक नागरिकांनी 21 मीटर अतिक्रमण विरोधी कारवाईला विरोध केला. यावेळी स्थानिक नागरिक व एनएचएआय, पीएमआरडीएचे अधिकारी यांच्यामध्ये चर्चा झाली. परंतु, काही तोडगा निघत नसल्याने अखेर लोणी काळभोर पोलिसांना बोलविण्यात आले.
लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांनी अतिक्रमण विभागाचे अधिकारी व नंदकिशोर काळभोर, सुरेश काळभोर, अतुल काळभोर, आकाश काळभोर व स्थानिक नागरिकांशी चर्चा घडवून आणली. या चर्चेदरम्यान एनएचआयच्या हद्दीतील 15 मीटर अंतरावरील अतिक्रमणे काढण्याचा निर्णय झाला आहे. त्यामुळे महामार्गाच्या दोन्ही बाजूकडील 15 मीटरवरील अतिक्रमणे काढण्यात येणार आहेत. व कवडीपाट टोल नाक्यापासून या कारवाईला सुरवात झाली आहे.
दरम्यान, पुणे-सोलापूर राष्ट्रीय महामार्गावरील कवडीपाट ते यवत या दरम्यान रस्त्याच्या दोन्ही बाजूला मोठ्या प्रमाणात अतिक्रमणे आहेत. यामध्ये हॉटेल, अनधिकृत टपऱ्या व दुकानांचा समावेश आहे. त्यामुळे रस्त्यावरील ही अतिक्रमण करून थाटलेली दुकाने निघणार कि नाहीत? अशी नागरिकांमध्ये जोरदार चर्चा रंगली होती. मात्र सध्या 15 मीटर अंतरावरील अतिक्रमणे काढण्यात येणार आहेत. तसेच उर्वरित 6 मीटरवरची अतिक्रमणे पुणे महानगर प्रदेश विकास प्राधिकरण नोटीस बजावून लवकरच काढणार आहे. त्यामुळे या कारवाईकडे संपूर्ण जिल्ह्याचे लक्ष लागले आहे.
