लोणी काळभोर: फिरायला जाण्यासाठी दिलेल्या थार गाडीचा अपघात झाल्याचा राग मनात धरून एका विद्यार्थ्याचे अपहरण झाल्याची घटना एकाद्या सिनेमातील पटकथेला शोभेल अशी घडली आहे. ही घटना लोणी काळभोर (ता. हवेली) ग्रामपंचायत हद्दीतील तारासिटी सोसायटीच्या परिसरात शनिवारी (ता.5) रात्री एक वाजण्याच्या सुमारास घडली आहे. या गुन्ह्याची 12 तासाच्या आत उकल करून लोणी काळभोर पोलिसांनी चार अपहरणकर्त्यांना अटक केली आहे.
भावेश प्रमोद चौधरी (वय-21), रितेश होना चव्हाण (वय-21), अभिषेक हरिदास सराटे (वय-21) व वरद विलास नखाटे (वय-21, सर्व रा. एक्सविरयों सोसायटी, हिंजवडी पुणे) अशी अटक करण्यात आलेल्या आरोपींची नावे आहेत. तर शरण गौडा (वय 24, लोणी काळभोर ता. हवेली जि. पुणे, मूळ रा. विजापुर कर्नाटक) असं अपहरणातून सुखरूप सुटका करण्यात आलेल्या विद्यार्थ्याचे नाव आहे. तर याप्रकरणी युवराज नरेंद्रपाल सिंग (वय 24, लोणी काळभोर ता. हवेली जि.पुणे मुळ रा. राजस्थान) यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी युवराज सिंग व शरण गौडा हे लोणी काळभोर येथील एका शैक्षणिक संकुलात शिक्षण घेत आहेत. तर हे लोणी काळभोर परिसरातील इमारतीत एकाच फ्लॅटमध्ये राहतात. फिर्यादी व त्यांच्या मित्रांनी बाहेर फिरायला जायचे ठरविले होते. शरण याने हिंजवडी येथील भावेश चौधरी याची थार गाडी फिरायला जाण्यासाठी बुक केली होती. शरण व सिध्दांत हे गुरुवारी (ता.3) रात्री साडेदहा वाजण्याच्या सुमारास गाडी आणण्यासाठी गेले होते. ठरल्याप्रमाणे थार गाडी ताब्यात घेऊन लोणी काळभोरला माघारी निघाले होते. तेव्हा सिद्धांत हा गाडी चालवीत होता.
थार गाडी घेऊन येत असताना हिंजवडी येथील एक्सविरर्या सोसाएटी मधील वळणावर एका झाडाला सिद्धांतकडून थार गाडी धडकली. या अपघातात थार गाडीचे मोठे नुकसान झाले होते. तर शरण व सिध्दांत या दोघानाही किरकोळ मार लागला होता. दोघांनीही या अपघाताची माहिती भावेश चौधरी याला दिली. तसेच गाडी त्यांच्या ताब्यात देऊन अपघातात झालेल्या नुकसानीचे खर्च देवु असे सांगितले.
दरम्यान, थार गाडीचा अपघात करून गाडीचे नुकसान केले आहे. तसेच अद्यापही नुकसान भरपाई न दिल्याचा राग मनात धरुन चारही आरोपी फिर्यादी युवराज सिंग यांच्या फ्लॅटवर शनिवारी (ता.५) रात्री एक वाजण्याच्या सुमारास आले. आरोपींनी फ्लॅटचा दरवाजा तोडून घरात प्रवेश केला. त्यानंतर आरोपींनी शरण यास शिवीगाळ, दमदाटी करुन लाथाबुक्क्यांनी मारहाण केली. आणि शरण याचे अपहरण करून वेरणा गाडीमध्ये घेऊन गेले.
याप्रकरणी युवराज सिंग यांनी लोणी काळभोर पोलीस ठाण्यात फिर्याद दिली. त्यानुसार आरोपींच्या विरोधात भारतीय न्याय संगीता कलम 137(2), 333, 115, 352, 351 (2) (3), 314 (4)(5)3×5 प्रमाणे गुन्हा दाखल करण्यात आला आहे. गुन्हा दाखल होताच, लोणी काळभोर पोलिसांनी शरण गौडा यांची सुखरूप सुटका केली आहे. तर अवघ्या 12 तासाच्या आत चारही आरोपींना मोठ्या शिताफीने बेड्या ठोकल्या आहे.
ही उल्लेखनीय कामगिरी पुणे शहर पोलिस उपायुक्त डॉ.राजकुमार शिंदे, सहाय्यक पोलीस आयुक्त अनुराधा उदमले यांच्या मार्गदर्शनाखाली लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक अनिल जाधव, सर्जेराव बोबडे, पूजा माळी, पोलीस हवालदार विलास शिंदे, पोलीस अंमलदार बाजीराव वीर, शैलेश कुदळे, राहुल कर्डिले व त्यांच्या सहकाऱ्यांनी केली आहे.
