gautami patil movie : सोलापूर : नृत्यांगणा गौतमी पाटील लवकरच रुपेरी पडद्यावर येणार आहे. तिचे नृत्य अनेकांना घायाळ करणारे आहे. तिने आपल्या अदाकारी आणि नृत्याने अनेकांना वेड लावले आहे. लावणी आणि सौंदर्यामुळे तिच्या कार्यक्रमांना राज्यभरात मोठी मागणी असते. गौतमी पाटील हिची प्रमुख भूमिका असलेल्या ‘घुंगुरु’ चित्रपटाचे पोस्टर आणि ट्रेलर प्रदर्शित झाले आहे. हा चित्रपट येत्या 15 डिसेंबरला एकाच वेळेस 100 चित्रपटगृहात प्रेक्षकांच्या भेटीला येणार असल्याचे निर्माते बाबा गायकवाड यांनी सांगितले.
चित्रपटची काय आहे कथा?
हा चित्रपट गौतमी पाटील हिच्या आयुष्यावर दाखवण्यात आला आहे. एकंदरीत लोककलावंत आणि त्यांचा संघर्ष चित्रपटातून मांडण्यात आला आहे. बाबा गायकवाड यांनी ‘घुंगुरु’ चित्रपटाची कथा लिहिली आहे. चित्रपटाचे निर्मातेही तेच आहेत. ‘घुंगुरु’ चित्रपट 15 डिसेंबरपासून प्रदर्शित होणार आहे. तिला जीवनात आलेला संघर्ष आणि मिळालेले यश चित्रपटातून दाखवण्यातक येणार आहे.
गौतमी स्वत: करणार प्रमोशन
गौतमी पाटील ही स्वत: चित्रपटाचे प्रमोशन करणार आहे. 10 डिसेंबरपासून त्यासाठी ती राज्यातील प्रमुख शहरात फिरणार आहे. या चित्रपटाचे चित्रीकरण महाराष्ट्राबाहेरही झाले आहे. मराठीसह इतर हिंदी आणि इतर प्रादेशिक भाषांतही चित्रपटाचे डबिंग करण्यात येणार आहे. महानगरात नव्हे तर खेड्यापाड्यात तिचे कार्यक्रम हाऊसफुल्ल झाले आहेत. त्यामुळे तिचा नवा चित्रपट हिट होईल असं अनेकांकडून सांगण्यात येत आहे.
