Hapus Mango : पुणे : आंबा हा फळांचा राजा आहे. बच्चे कंपनीपासून ज्येष्ठापर्यंत अनेकांना आंब्याची गोडी चांगलीच आवडते. त्यातच हापूस म्हटलं तर विशयच संपला. चवदार असल्यामुळे त्याला मोठी मागणी असते. देशात नाही विदेशात हापूस आंब्याला मागणी आहे. नुकताच हापूस आंबा बाजारात दाखल झाला आहे. पुणे बाजारात देवगड हापूसची पहिली पेटी डिसेंबर महिन्याच्या सुरुवातीलाच आली आहे. पुणे बाजार समितीमधील गुलटेकडी मार्केटमध्ये हापूस आंब्याची पहिली पेटी आली आहे. आंब्याची पहिली पेटी घेण्यासाठी ग्राहकांनी उच्चांकी दर लावला होता.
किती दर मिळाला
हापूस आंब्याच्या पहिल्या पेटीचा लिलाव आडते असोसिएशनचे माजी उपाध्यक्ष युवराज काची यांच्या गाळ्यावर झाला. त्यांच्याकडे देवगड हापूसच्या पाच पेट्या आल्या होत्या. या पाच पेट्यांपैकी पाच डझनच्या एका पेटीला तब्बल २१ हजार रुपये दर मिळाला. त्या खालोखाल इतर पेट्यांना १५ हजार आणि ११ हजार दर मिळाला आहे. त्यामुळे आंबा उत्पादक खूश झाले.
कोणी घेतला आंबा
कोथरुडमधील रहिवाशी जोतिराम बिराजदार आणि जगन्नाथ वंजारी यांनी या आंब्याची खरेदी केली. देवगड येथील रज्जाद काची यांच्या बागेतील हा आंबा होता. फेब्रुवारीपासून नियमित हंगाम सुरु होणार आहे. त्यावेळी मोठ्या प्रमाणावर आंब्याची आवक होऊन ग्राहकांना चव चाखता येणार आहे. कोकणातील हापूस पुणे शहरात आलेला असताना कोल्हापूरातही हापूस आला आहे. पण हा आंबा दक्षिण आफ्रिका येथील मालावी शहरातून आलेला आहे. दक्षिण आफ्रिकेतून सध्या १० पेट्या कोल्हापुरात दाखल झाल्या आहेत. १५ आंबे असलेल्या एका पेटीची किंमत ३८०० रुपये आहे. कोकणातील हापूसची कलम आफ्रिकेत नेली होती.
