पुणे : नॅचरोपॅथी केअरचा डॉक्टर असल्याचे सांगून ‘तुंबडी’ उपचाराच्या नावाखाली महिलेच्या गुडघ्यात तीन वेळा सुई टोचून रक्त काढल्याचा धक्कादायक प्रकार फुरसुंगी परिसरात समोर आला आहे. या प्रकरणी फुरसुंगी पोलिसांनी शहजाद इक्बाल मोहम्मद खान ऊर्फ राज पटेल (वय ४२, सध्या रा. भोसरी, मूळ रा. सांगोद, कोटा, राजस्थान) याला अटक केली आहे. त्याच्याकडे वैद्यकीय उपचार करण्यासाठी कोणतेही अधिकृत प्रमाणपत्र किंवा मेडिकल कौन्सिलची मान्यता नसल्याचे पोलिसांच्या तपासात समोर आले आहे.
ही घटना ४ ऑक्टोबर २०२६ रोजी फुरसुंगी येथील भेकराईनगरमधील एस. पी. रेसिडेन्सी येथे घडली. पोलिसांनी दिलेल्या माहितीनुसार, आरोपीने ३ ऑक्टोबर रोजी एका तरुणाला फोन करून आपण डॉक्टर असल्याचे सांगितले. त्याच्या आईच्या गुडघ्याचे उपचार करण्याची तयारीही त्याने दर्शवली. मात्र, संबंधित महिलेवर रुग्णालयात उपचार सुरू असल्याने तरुणाने त्याला नकार दिला. त्यानंतर दुसऱ्या दिवशी आरोपी त्यांच्या घरी पोहोचला.
आरोपीने महिलेचे दोन्ही गुडघे तपासले आणि एका गुडघ्यात सुई टोचून रक्त काढले. हे रक्त अशुद्ध असल्याचे सांगत त्याने तीन वेळा रक्त काढल्याचा आरोप आहे. प्रत्येक वेळी चार हजार रुपये, असे एकूण १२ हजार रुपये त्याने घेतले. ही रक्कम स्कॅनरद्वारे पाठवण्यास सांगितल्यानंतर आणखी दोन ते तीन वेळा उपचार करावे लागतील, त्यानंतर आराम मिळेल, असेही त्याने सांगितले.
आरोपीच्या वागणुकीवर संशय आल्याने संबंधित तरुणाने गुन्हे शाखेच्या युनिट ६ मधील पोलीस हवालदार पल्लवी मोरे यांना माहिती दिली. त्यानंतर पथकाने भेकराईनगर येथे जाऊन राज पटेल नाव सांगणाऱ्या व्यक्तीला ताब्यात घेतले. त्याला फुरसुंगी प्राथमिक आरोग्य केंद्रात नेण्यात आले. तेथे डॉ. राजेश महादेव पाखरे यांनी चौकशी केली असता त्याच्याकडे कोणतेही वैद्यकीय नोंदणी प्रमाणपत्र नसल्याचे स्पष्ट झाले.
त्याच्या रेग्झीन बॅगेत विविध औषधे आणि शहजाद इक्बाल मोहम्मद खान या नावाचे आधार कार्ड सापडले. चौकशीत त्याने शहजाद हेच आपले खरे नाव असल्याचे सांगितले. वैद्यकीय उपचार करण्याची अधिकृत परवानगी नसतानाही ‘तुंबडी’ उपचार करत असल्याचे त्याने मान्य केल्याने डॉ. राजेश पाखरे यांनी पोलिसांत फिर्याद दिली. वरिष्ठ पोलीस निरीक्षक अमोल मोरे यांच्या मार्गदर्शनाखाली पोलीस उपनिरीक्षक शंभूराज जाधव पुढील तपास करीत आहेत.
