दौंड, ता. 12 : पहिल्या पत्नीला त्रास देत असल्याच्या कारणावरून तिघांनी मिळून पती-पत्नीची दुचाकी अडवून त्यांच्यावर चाकू, लाकडी दांडका आणि लाथाबुक्क्यांनी हल्ला केल्याची घटना दौंडमधील नानवीज पोलीस ट्रेनिंग सेंटरजवळ घडली. या हल्ल्यात पती गंभीर जखमी झाला असून, त्याच्या दुसऱ्या पत्नीवरही चाकूने वार करण्यात आले आहेत. याप्रकरणी दौंड पोलिसांनी तिघांविरुद्ध गुन्हा दाखल केला आहे.
अभि इस्टाप शिंदे (वय 24, रा. मोरेवस्ती, लिंगाळी, दौंड) असे जखमी पतीचे नाव आहे. पोलिसांनी दिलेल्या माहितीनुसार, अभि शिंदे हा पत्नी अमेरिकासोबत दुचाकीवरून नानवीज येथे सासूकडे 8 नोव्हेंबर रोजी सायंकाळी सातच्या सुमारास जात होता. त्यावेळी नानवीज पोलीस ट्रेनिंग सेंटरजवळील गुर्हाळाच्या बाजूला अमिर लखन पवार, श्रवण लखन पवार आणि काक्या काळे यांनी दोन दुचाकी आडव्या लावून त्यांची गाडी अडवली.
‘तू माझ्या बहिणीला त्रास का देतोस?’ असे म्हणत आरोपींनी वाद घालण्यास सुरुवात केली. त्यानंतर श्रवण पवार याने चाकूने अभि शिंदे याच्या डाव्या बरगडीवर, पोटावर, पाठीमागील खांद्यावर आणि उजव्या मनगटावर वार केले. तर काक्या काळे याने लाकडी दांडक्याने आणि लाथाबुक्क्यांनी मारहाण केली. पतीला वाचवण्यासाठी पत्नी अमेरिका पुढे आली असता, अमिर पवार याने तिच्या पाठीवर चाकूने वार केला. तसेच काक्या काळे याने तिच्या डाव्या पायावर लाकडी दांडक्याने मारहाण करून शिवीगाळ केली.
दरम्यान, पोलीस ट्रेनिंग सेंटरमधील पोलिसांनी आरडाओरडा केल्याने आरोपी घटनास्थळावरून पळून गेले. त्यानंतर जखमी दाम्पत्याला उपचारासाठी रुग्णालयात दाखल करण्यात आले. याप्रकरणी अभि शिंदे यांच्या फिर्यादीवरून दौंड पोलीस ठाण्यात भारतीय न्याय संहितेच्या विविध कलमानुसार गुन्हा दाखल करण्यात आला आहे. पुढील तपास सहायक फौजदार सय्यद करीत आहेत.
