पुणे : अलीनगर विधानसभा मतदारसंघातील भाजप आमदार मैथिली ठाकूर आणि त्यांचे वडील रमेश ठाकूर यांच्यावर जमीन वादाच्या प्रकरणात कारवाई करण्यात आली आहे. तारडीह तालुक्यातील पोखरभिंडा गावातील सरकारी रस्त्यावर अतिक्रमण केल्याची तक्रार ग्रामस्थांनी प्रशासनाकडे केली होती. या प्रकरणाची तातडीने दखल घेत महसूल प्रशासनाने घटनास्थळी जाऊन मोजमाप केले आणि अतिक्रमण हटवले आहे.
ग्रामस्थांनी दिलेल्या अर्जात सरकारी रस्ता, काही खाजगी जमीन, ग्राम देवता तिवारी बाबा स्थान, राधाकृष्ण मंदिर तसेच नाल्यासाठी आरक्षित असलेल्या जमिनीवर बेकायदेशीर ताबा मिळवल्याचा आरोप केला होता. या तक्रारीनंतर डीसीएलआर अजय कुमार आणि सीओ आलोक कुमार हे अधिकारी आपल्या पथकासह गावात दाखल झाले. त्यांनी प्रत्यक्ष पाहणी करून मोजमाप केले आणि अतिक्रमण झालेला भाग मोकळा केला. तसेच इतर ग्रामस्थांच्या तक्रारींसंदर्भात सोमवारी पुरावे घेऊन कार्यालयात येण्याचे आदेश प्रशासनाने दिले आहेत.
दरम्यान, या सर्व कारवाईनंतर आमदार मैथिली ठाकूर यांनी आपली पहिली प्रतिक्रिया दिली आहे. आपल्या आणि कुटुंबावर करण्यात आलेले सर्व आरोप त्यांनी फेटाळून लावले आहेत. सोशल मीडियावर सुरू असलेली चर्चा आणि आरोप पूर्णपणे निराधार व खोटे असल्याचे त्या म्हणाल्या. अशा खोट्या आरोपांमुळे आपल्याला खूप वाईट वाटल्याचे त्यांनी नमूद केले.
जर कोणाकडे खरोखर काही पुरावे असतील, तर त्यांनी ते पुराव्यानिशी समोर आणावेत, असे आव्हानही त्यांनी यावेळी दिले आहे. प्रशासनाकडून या प्रकरणाचा पुढील तपास सुरू असून कागदपत्रांची पडताळणी केली जात आहे असे मैथिली ठाकूर यांनी म्हटले आहे.
