पुणे : ‘ वॉक इट आऊट, टॉक इट आऊट’ ग्रुप आणि एरंडवण्यातील शामराव कलमाडी हायस्कूलतर्फे येत्या बालदिनी (ता. १४ नोव्हेंबर) अभिनव उपक्रम आयोजित करण्यात आला आहे. या उपक्रमा अंतर्गत सुमारे १८०० विद्यार्थी चालत शाळेत जाणार आहेत.
चालण्याचा व्यायाम लोकप्रिय करण्यासाठी आणि शालेय विद्यार्थ्यांमध्ये त्याबाबत जागरूकता निर्माण करण्यसाठी या उपक्रमाचे आयोजन करण्यात आल्याची माहिती ग्रुपच्या संचालिका नेहा येवले आणि शामराव कलमाडी हायस्कूलच्या मुख्याध्यापिका पल्लवी नाईक यांनी दिली आहे.
तसेच सर्व वयोगटातील इच्छुकांनी ‘ वॉक इट आऊट, टॉक इट आऊट’ ग्रुपच्या फेसबुक, इंस्टाग्राम पेजवर संपर्क साधावा, असे आवाहन त्यांनी केले आहे. या बाल दिनाच्या निमत्ताने सर्वांनी या उपक्रमात सहभागी होत निसर्गपूरक पर्यावरण व आरोग्यदायी जीवनशैलीचा आनंद घ्यावा, असे आवाहन देखील येवले यांनी केले आहे.
दरम्यान, सोमवारी (ता. १४) सकाळी सहा वाजता सुरू होणाऱ्या या उपक्रमात कोथरूड परिसरात स्वयंसेवक हवे आहेत. शिक्षक आणि स्वयंसेवकांच्या मदतीने १८०० हून अधिक शालेय विद्यार्थी सुमारे दोन किलोमीटर अंतर चालणार आहेत. त्यासाठी अणखी स्वयंसेवकांची आवश्यकता असणार असल्याची माहिती देखील त्यांनी दिली आहे.
