यवत : पुणे पुणे शहर पोलिसांच्या युनिट ३ मधील पोलीस अधिकारी प्रकाश कट्टे यांच्यावर यवत हद्दीत झालेल्या गोळीबार प्रकरणातील आरोपीची ओळख पटविण्यात यवत पोलिसांना यश आले आहे.
निहालसिंग मनसिंग टाक (रा. हडपसर, रामटेकडी, पुणे) हे गोळीबार करणाऱ्या आरोपीचे नाव असून, यवत पोलिसांनी गोळीबार केल्याप्रकरणी टाक व त्याचा सहकारी लकीसिंग गब्बरसिंग टाक (रा. सध्या धनगरवाडी, यवत, (ता. दौंड) मुळगाव रामटेकडी, पुणे) या दोघांच्या विरोधात गुन्हा दाखल केला असल्याची माहिती यवत पोलीस ठाण्याचे वरिष्ठ पोलीस निरीक्षक नारायण पवार यांनी दिली आहे.
युनिट ३ चे कनिष्ठ अधिकारी प्रकाश दादासाहेब कट्टे व त्यांचे २ सहकारी वरील दोन्ही आरोपींना पकडण्यासाठी मंगळवारी रात्री गेले होते. त्यावेळी प्रकाश कट्टे यांनी लकी सिंग याला ताब्यात घेतल्यानंतर, त्याला सोडवण्यासाठी निहाल सिंग याने प्रकाश कट्टे यांच्या दिशेने गोळीबार केला होता. या गोळीबारात कोणीही जखमी झाले नसले तरी पोलिसांची सुरक्षितता अऐरणीवर आली आहे.
दरम्यान, सदर घटनेची माहिती पुणे शहर पोलिसांनी यवत पोलिसांना दिली असता यवत पोलीस स्टेशनचे आधिकारी व कर्मचारी घटनास्थळी दाखल झाले होते तसेच पुढील तपास सुरू आहे.
