जेजुरी, ता. ४ : पिसर्वे (ता. पुरंदर) गावात वीजचोरीविरोधात कारवाई करण्यासाठी गेलेल्या महावितरणच्या पथकावर हल्ला झाल्याची धक्कादायक घटना घडली आहे. कारवाईदरम्यान महिला कनिष्ठ अभियंत्याच्या हातातील मोबाईल हिसकावून फेकण्यात आला, तर पथकातील अधिकाऱ्यांना मारहाण व धक्काबुक्की करून सरकारी कामात अडथळा आणण्यात आला. याप्रकरणी जेजुरी पोलिस ठाण्यात पाच जणांविरुद्ध गुन्हा दाखल करण्यात आला आहे.
संदीप अंकुश कोलते, सचिन कांतीलाल कोलते, गणेश कोलते, वैभव कोलते आणि अरुण अंकुश कोलते (सर्व रा. पिसर्वे, ता. पुरंदर) अशी गुन्हा दाखल झालेल्यांची नावे आहेत. याप्रकरणी महावितरणचे प्रधानतंत्रज्ञ विक्रम किसनराव तुपे (वय ४१, रा. बारामती) यांनी जेजुरी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, महावितरणचे प्रधानतंत्रज्ञ विक्रम तुपे हे गेल्या १६ वर्षांपासून महावितरणमध्ये कार्यरत असून सध्या राजेवाडी शाखेत प्रधानतंत्रज्ञ म्हणून काम पाहत आहेत. वरिष्ठ कार्यालयाच्या आदेशानुसार २ जुलै रोजी वीजचोरीविरोधी विशेष मोहीम राबविण्यात आली होती.
या मोहिमेसाठी कनिष्ठ अभियंता मनीषा साबळे, वरिष्ठ तंत्रज्ञ आकाश लिंभोरे, स्वप्निल भगत, वैभव वाघमारे, राजेंद्र खेसे, कानिफनाथ खेडेकर यांच्यासह दोन पथके तयार करण्यात आली होती. दुपारी साडेएक वाजण्याच्या सुमारास पथकाने पिसर्वे गावातील सुपा–सासवड मार्गावरील साईलिला हॉटेल येथे तपासणी केली असता, हॉटेलच्या मागील मोटार, पंखे व विद्युत उपकरणांसाठी बेकायदेशीररीत्या वीज वापर सुरू असल्याचे निदर्शनास आले. महिला कनिष्ठ अभियंता मनीषा साबळे या कारवाईचे व्हिडिओ चित्रीकरण करत असताना १० ते १२ जणांचा जमाव तेथे जमा झाला. त्यातील काही जणांनी कारवाई थांबविण्याचा प्रयत्न केला. यावेळी संशयित संदीप अंकुश कोलते याने साबळे यांच्या हातातील मोबाईल हिसकावून रस्त्यावर फेकला.
महावितरणच्या कर्मचाऱ्यांनी परिस्थिती समजावून सांगण्याचा प्रयत्न केला असता, संशयितांनी प्रधानतंत्रज्ञ विक्रम तुपे यांना मारहाण केली. त्यानंतर वरिष्ठ अधिकारी जीवन दिलीप ठोंबरे घटनास्थळी पोहोचले असता त्यांनाही धक्काबुक्की करण्यात आली. वाद अधिक वाढू नये म्हणून पथक तेथून निघाले. मात्र, पोलिस ठाण्याकडे जात असताना वैभव कोलते याने “पुन्हा येथे आलात तर हातपाय तोडू,” अशी धमकी दिली.
त्यानंतर जखमी अधिकाऱ्यांनी उपचार घेत जेजुरी पोलिस ठाण्यात तक्रार दाखल केली. या प्रकरणी जेजुरी पोलिसांनी संदीप अंकुश कोलते, सचिन कांतीलाल कोलते, गणेश कोलते, वैभव कोलते आणि अरुण अंकुश कोलते यांच्याविरुद्ध शासकीय कामात अडथळा आणणे, सरकारी कर्मचाऱ्यांना मारहाण करणे, धमकी देणे तसेच इतर संबंधित कलमान्वये गुन्हा दाखल केला असून पुढील तपास सुरू आहे.
