पुणे: पुणेकरांच्या वाहनांची गेल्या अनेक वर्षांपासूनची ओळख असलेली ‘MH-12’ ही वाहन नोंदणी मालिका आता संपली आहे. त्यामुळे पुण्यातील नव्या वाहनांवर आता ‘MH-61’ हा नवा नोंदणी क्रमांक झळकणार आहे. विशेष म्हणजे, नव्या मालिकेचे पुणेकरांकडून उत्स्फूर्त स्वागत होत असून, चॉइस नंबरसाठीही मोठ्या प्रमाणात अर्ज दाखल झाले आहेत.
पुणे प्रादेशिक परिवहन कार्यालयाने दिलेल्या माहितीनुसार, ‘MH-12’ अंतर्गत उपलब्ध असलेल्या नोंदणी मालिका संपल्याने नवीन वाहनांसाठी ‘MH-61’ हा कोड सुरू करण्यात आला आहे. चारचाकी वाहनांसाठी ‘MH-61 A’, तर दुचाकी वाहनांसाठी ‘MH-61 B’ अशी मालिका असणार आहे.
‘MH-12’ ही पुण्याच्या वाहनांची खास ओळख बनली होती. त्यामुळे ही मालिका संपल्यानंतर नवीन मालिका कोणती असेल, याबाबत पुणेकरांमध्ये उत्सुकता होती. अखेर ‘MH-61’ ही नवी मालिका सुरू करण्यात आली आहे.
सणासुदीच्या काळात मोठ्या प्रमाणात वाहनांची खरेदी होत असल्याने नोंदणी प्रक्रियेत अडथळा येऊ नये, यासाठी परिवहन विभागाने नवीन मालिका सुरू केली आहे. नव्या मालिकेतील आकर्षक आणि व्हीआयपी क्रमांकांसाठीही वाहनधारकांकडून मोठा प्रतिसाद मिळत आहे. 0001, 1111, 9999, 1234 यांसारख्या क्रमांकांना विशेष पसंती मिळत आहे. चॉइस नंबरसाठी आतापर्यंत जवळपास ११०० अर्ज प्राप्त झाल्याची माहिती सहाय्यक प्रादेशिक परिवहन अधिकारी विनायक साखरे यांनी दिली.
चारचाकी वाहनांसाठीची नवीन मालिका शनिवारपासून, तर दुचाकी वाहनांसाठीची मालिका सोमवारनंतर सुरू होणार असल्याचेही त्यांनी सांगितले.
‘MH-12’ची ओळख पुणेकरांच्या मनात कायम असली, तरी आता ‘MH-61’ हा क्रमांक पुण्याच्या रस्त्यांवर दिसणार आहे. नव्या वाहनांसोबत पुण्याची ही नवी वाहन ओळखही आगामी काळात अधिक ठळक होणार आहे.
