पुणे: पुणे-माणगाव मार्गावरील ताम्हिणी घाटात ३० वर्षीय विवाहित महिलेची हत्या झाल्याची धक्कादायक घटना समोर आली आहे. कोंडेथर गावाच्या हद्दीत मंगळवारी दुपारी झुडपांमध्ये महिलेचा मृतदेह आढळून आला होता. सुरुवातीला हा अपघाती मृत्यू असल्याचा संशय व्यक्त करण्यात आला आणि पोलिसांनी त्यानुसार नोंद केली. मात्र, वैद्यकीय तपासणीत महिलेचा गळा आवळून खून करण्यात आल्याचे स्पष्ट झाले. त्यानंतर पोलिसांनी तपासाची दिशा बदलून आरोपींचा शोध सुरू केला.
सुमन गोपाळ यादव (वय ३०, रा. चिखली, पुणे) असे मृत महिलेचे नाव आहे. या प्रकरणी पोलिसांनी दुर्गाप्रसाद प्रजापती (वय २४) आणि त्याचा चुलत भाऊ दिनेशकुमार प्रजापती (वय २७, दोघेही रा. पिंपरी-चिंचवड) यांना अटक केली आहे.
पोलिसांच्या तपासानुसार, सुमन आणि दुर्गाप्रसाद यांच्यात गेल्या काही महिन्यांपासून संबंध होते. सुमनचा पती उत्तर प्रदेशातील एका गुन्ह्यात तुरुंगात असताना दोघांची जवळीक वाढली. पती तुरुंगातून बाहेर आल्यानंतर सुमन सुमारे दोन महिन्यांपूर्वी दुर्गाप्रसादसोबत चिखली येथे राहण्यास आली होती. मात्र, तिने आपल्या दोन लहान मुलांनाही सोबत आणून त्यांची जबाबदारी स्वीकारण्याचा आग्रह धरला. दुर्गाप्रसादला हा आग्रह मान्य नव्हता. यावरून दोघांमध्ये वाद सुरू झाले.
अखेर दुर्गाप्रसादने सुमनचा काटा काढण्याचा निर्णय घेतल्याचे तपासात समोर आले. त्याने आपल्या चुलत भावाची मदत घेतली. दोघांनी फिरायला जाण्याच्या बहाण्याने सुमनला कारमध्ये बसवले. त्यानंतर कारमध्येच तिच्या ओढणीने गळा आवळून तिची हत्या केली. हत्या केल्यानंतर मृतदेह ताम्हिणी घाटातील झुडपांमध्ये टाकून आरोपी निघून गेले.
मृतदेह सापडल्यानंतर रायगड पोलिसांनी तपासाला वेग दिला. वैद्यकीय अहवालातून हत्या स्पष्ट झाल्यानंतर स्थानिक गुन्हे शाखेने मोबाईल टॉवर डंप डेटा आणि तांत्रिक विश्लेषणाच्या मदतीने आरोपींचा माग काढला. पोलिसांनी अवघ्या २४ तासांत पिंपरी-चिंचवड येथून दोन्ही आरोपींना ताब्यात घेतले. न्यायालयाने त्यांना ३१ ऑगस्टपर्यंत पोलीस कोठडी सुनावली असून, माणगाव पोलीस या प्रकरणाचा पुढील तपास करत आहेत.
