पुणे : पावसाळा सुरू असताना शहरात विविध साथीच्या आजारांचा प्रादुर्भाव वाढताना दिसत आहे. डेंग्यू, चिकनगुनिया, स्वाईन फ्लू तसेच अज्ञात तापाच्या रुग्णसंख्येत वाढ झाल्याने पुणे महापालिकेच्या आरोग्य विभागाची चिंता वाढली आहे. बदलते हवामान आणि डासांचा वाढता प्रादुर्भाव यामुळे आगामी काळात नागरिकांनी अधिक काळजी घेण्याची गरज व्यक्त केली जात आहे.
पुणे महानगरपालिकेच्या मेट्रोपॉलिटन सर्व्हेलन्स युनिटच्या आकडेवारीनुसार, जानेवारी ते जुलै २०२६ या सात महिन्यांत शहरात ‘फिव्हर ऑफ अननोन ओरिजिन’ म्हणजेच अज्ञात तापाचे तब्बल २१ हजार ५१२ रुग्ण आढळले आहेत. तापाचे नेमके कारण स्पष्ट न झालेल्या या रुग्णांची संख्या मोठी असल्याचे आकडेवारीवरून दिसून येते.
याच कालावधीत स्वाईन फ्लूचे २७० रुग्ण नोंदविण्यात आले होते. मात्र, ऑगस्ट महिन्याच्या सुरुवातीपासूनच रुग्णसंख्येत लक्षणीय वाढ झाली आहे. ऑगस्टच्या अवघ्या २५ दिवसांत शहरात स्वाईन फ्लूचे आणखी २०५ रुग्ण आढळले आहेत. त्यामुळे पावसाळ्यात स्वाईन फ्लूचा संसर्ग वाढत असल्याचे चित्र आहे.
डेंग्यूच्या रुग्णसंख्येतही वाढ झाली आहे. जानेवारी ते जुलै या कालावधीत पुणे शहरात डेंग्यूचे ९८२ रुग्ण आढळले. तर चिकनगुनियाचे १४ रुग्ण नोंदविण्यात आले आहेत.
पावसामुळे अनेक ठिकाणी पाणी साचत असल्याने डासांच्या उत्पत्तीला पोषक वातावरण निर्माण होते. त्यामुळे डेंग्यूसारख्या आजारांचा धोका वाढण्याची शक्यता आहे. नागरिकांनी घराच्या परिसरात पाणी साचू न देणे, पाण्याची भांडी झाकून ठेवणे आणि डासांची उत्पत्ती होणार नाही याची काळजी घेणे आवश्यक आहे.
दरम्यान, ताप, अंगदुखी, तीव्र अशक्तपणा किंवा इतर संशयास्पद लक्षणे जाणवल्यास नागरिकांनी दुर्लक्ष न करता वैद्यकीय सल्ला घ्यावा, असे आवाहन आरोग्य यंत्रणेकडून करण्यात येत आहे. पावसाळ्यात वाढणाऱ्या आजारांच्या पार्श्वभूमीवर नागरिकांनी खबरदारी घेणे महत्त्वाचे ठरणार आहे.
