पुणे : महाराष्ट्रात नोव्हेंबरच्या मध्यावर हवामानात मोठा बदल पाहायला मिळत आहे. दिवसा कडक ऊन आणि पहाटे व रात्री हुडहुडी भरवणारा गारवा, अशा संमिश्र वातावरणाची अनुभूती सध्या राज्यभर येत आहे. आज रविवार, 15 नोव्हेंबर रोजी राज्यातील हवामान कसे असेल, याबाबत नागरिकांमध्ये उत्सुकता होती. भारतीय हवामान विभागाच्या अंदाजानुसार, आज संपूर्ण राज्यात हवामान पूर्णपणे कोरडे राहणार असून पावसाचा कोणताही इशारा देण्यात आलेला नाही.
मुंबई आणि उपनगरांमध्ये आज आकाश मुख्यत्वे निरभ्र राहील. दिवसभर उन्हाचा चटका जाणवणार असला, तरी सकाळ आणि संध्याकाळच्या वेळी आल्हाददायक वातावरण असेल. त्यामुळे मॉर्निंग वॉक किंवा इव्हनिंग वॉकला जाणाऱ्या नागरिकांना छान वातावरण अनुभवायला मिळेल. मात्र, दुपारी उन्हाचे ढळढळीत प्रमाण असल्याने नागरिकांना काळजी घेण्याचा सल्ला देण्यात आला आहे.
विदर्भ, मराठवाडा, कोकण आणि मध्य महाराष्ट्रातही आज पावसाची शक्यता पूर्णपणे फेटाळण्यात आली आहे. ठाणे, पालघर, रायगड, रत्नागिरी आणि सिंधुदुर्ग या किनारपट्टीवरील जिल्ह्यांमध्येही हवामान कोरडे राहून रात्री हलका गारवा जाणवेल. तसेच पुणे, सातारा, सांगली, कोल्हापूर, सोलापूरसह पश्चिम महाराष्ट्रातील घाटमाथ्यावर पावसाची कोणतीही चिन्हे नाहीत.
विदर्भातील नागपूर, अमरावती, अकोला, वर्धा, यवतमाळ, चंद्रपूर आणि गोंदिया तसेच मराठवाड्यातील छत्रपती संभाजीनगर, जालना, बीड, लातूर, धाराशिव, नांदेड आणि परभणी या सर्वच जिल्ह्यांमध्ये हवामान एकदम स्वच्छ आणि कोरडे राहणार आहे.हवामानाची हीच अनुकूल स्थिती पाहता शेतीची कामे, वाहतूक आणि दैनंदिन व्यवहार कोणत्याही अडथळ्याविना सुरळीत पार पडतील. एकूणच, राज्यात सध्या हिवाळ्याची चाहूल लागल्यामुळे गुलाबी थंडीचा आनंद नागरिकांना घेता येत आहे.
