जुन्नर: जुन्नर तालुक्यातील पिंपळवंडी येथे साडेनऊ वर्षांच्या बालिकेवर अत्याचार करून हत्या करण्यात आल्याच्या घटनेनंतर उपमुख्यमंत्री सुनेत्रा अजित पवार यांनी पीडित कुटुंबाची भेट घेऊन सांत्वन केले. शासन कुटुंबाच्या पाठीशी ठामपणे उभे असून आरोपीवर कठोर कारवाई केली जाईल, अशी ग्वाही त्यांनी दिली.
घटनेच्या तपासाबाबत पुणे जिल्ह्याचे पोलीस अधीक्षक संदीपसिंह गिल यांच्याकडून माहिती घेत, तपासात कोणतीही त्रुटी राहू नये आणि लवकरात लवकर आरोपपत्र दाखल करावे, अशा सूचना त्यांनी पोलिसांना दिल्या. आरोपीला कठोर शिक्षा मिळावी यासाठी या प्रकरणाचा खटला फास्ट ट्रॅक कोर्टात चालविण्यात येणार असल्याचेही त्यांनी सांगितले.
पीडित कुटुंबाच्या पुनर्वसनासाठी शबरी घरकुल योजनेतून तातडीने घर उपलब्ध करून देण्याची कार्यवाही करण्यात येणार आहे. तसेच महिला आणि बालकांच्या सुरक्षेसाठी मोक्याच्या ठिकाणी सीसीटीव्ही कॅमेरे व हायमास्ट दिवे बसविण्याचे निर्देश देण्यात आले आहेत.
पिंपळवंडी परिसरातील नागरिकांना जातीचे दाखले मिळवून देण्यासाठी विशेष शिबिर आणि मोहीम राबविण्यात येणार असल्याचेही त्यांनी सांगितले.
पीडित कुटुंबाला राष्ट्रवादी वेल्फेअर फंडातून पाच लाख रुपयांची मदत जाहीर करण्यात आली आहे. याशिवाय मनोधैर्य योजनेतून दहा लाख रुपयांची मदत देण्याच्या सूचना महिला व बालविकास विभागाला देण्यात आल्या असून, न्यायालयीन समितीने त्यास मंजुरी दिली आहे. ही रक्कम कुटुंबाच्या खात्यावर जमा करण्याची कार्यवाही करण्यात येणार आहे.
या घटनेतील आरोपीला कठोर शिक्षा मिळावी आणि पीडित कुटुंबाला न्याय मिळावा, यासाठी शासनाकडून आवश्यक ती सर्व मदत केली जाईल, असे सुनेत्रा पवार यांनी स्पष्ट केले.
