पुणे : जिल्ह्यातील लोणावळा येथील लोहगड किल्ल्यावर झालेल्या केतन अग्रवाल मृत्यू प्रकरणात नवीन वळण आले आहे.आता या खटल्यात केतनची होणारी पत्नी सिया गोयल हिच्या वकिलांनी तिच्या जामिनासाठी जोरदार युक्तिवाद केला आहे. सियाच्या वकिलांनी पोलिसांच्या तपासावर प्रश्नचिन्ह उपस्थित करत, केवळ फोनवरील संवाद आणि चॅट्सच्या आधारावर हत्येचा कट सिद्ध होत नाही, असे म्हटले आहे. हा गुन्हा पूर्णपणे संशयावर आणि परिस्थितीजन्य पुराव्यांवर आधारित असून, तपासात कोणतेही ठोस स्वतंत्र पुरावे मिळालेले नाहीत, असा दावा बचाव पक्षाने केला आहे.
बचाव पक्षाने न्यायालयासमोर चार मुख्य मुद्दे मांडले आहेत. यामध्ये घटनास्थळाबाबत कुटुंबीयांनी घेतलेला आक्षेप, संशयाच्या आधारे दिलेली तक्रार, दोन व्यक्तींमधील चॅट म्हणजे हत्येचे नियोजन नव्हे, आणि केतनचा मृत्यू फोटो काढताना झालेल्या अपघातात झाला असल्याचा दावा यांचा समावेश आहे. सिया वयाने तरुण असल्याने तिला जामीन मिळावा, अशी मागणी वकिलांनी केली आहे.
पोलिसांनी या प्रकरणात डिजिटल पुराव्यांसह तीन महत्त्वाच्या साक्षीदारांचे जबाब नोंदवले आहेत. या साक्षीदारांच्या जबाबांवरच संपूर्ण खटल्याचे भवितव्य अवलंबून आहे. या बहुचर्चित प्रकरणातील आरोपी सिया गोयल हिच्या जामीन अर्जावर 17 नोव्हेंबरला सुनावणी होणार असून, यामध्ये पोलिसांचे भक्कम पुरावे आणि बचावाचे आक्षेप यावर मोठी कसोटी लागणार आहे.
सुरुवातीला हा अपघात मानला जात होता, मात्र नंतर तपासात हा पूर्वनियोजित खून असल्याचे उघड झाले. केतनची होणारी पत्नी सिया गोयल आणि तिचा प्रियकर चेतन चौधरी यांनी हा कट रचल्याचा आरोप पोलिसांनी केला असून, याप्रकरणी 5053 पानांचे आरोपपत्र दाखल करण्यात आले आहे.आता वकिलांच्या या युक्तिवादाने सियाला जामीन मिळणार का हे पाहणे महत्वाचे ठरणार आहे.
