पुणे : भरधाव कंटेनरने दुचाकीला जोरदार धडक दिली. या अपघातात दुचाकीवरील बाप-लेकीचा जागीच मृत्यू झाला. हा अपघात तळेगाव दाभाडे येथील एमआयडीसी परिसरातील जेसीबी कंपनीजवळ शनिवारी सायंकाळच्या सुमारास झाला. या अपघातात बाप-लेकीचा मृत्यू झाल्याने परिसरात हळहळ व्यक्त केली जात आहे.
तळेगाव दाभाडे एमआयडीसीजवळील जेसीबी कंपनीजवळ एका दुचाकीवर चौघेजण जात होते. हे सर्वजण खेडवरून त्यांच्या गावाकडे जात होते. नेमकं याचदरम्यान पाठीमागून येणाऱ्या निळ्या रंगाच्या कंटेनरने जोरदार धडक दिली. ही धडक इतकी भीषण होती की, यामध्ये दुचाकी दूर जाऊन पडली. यात बाप-लेकीचा जागीच मृत्यू झाला. तर दुचाकीच्या मागे बसलेले दोघेजण किरकोळ जखमी झाले आहेत.
दरम्यान, या घटनेची माहिती मिळताच तळेगाव पोलीस घटनास्थळी दाखल झाले होते. त्यांनी मृतदेह शवविच्छेदनासाठी पाठवला. अचानक झालेल्या अपघाताने या भागात काही वेळ वाहतूक कोंडी देखील झाली होती. या प्रकरणाचा पुढील तपास तळेगाव पोलीस करत आहेत.
मावळ तालुक्यात वाढले अपघाताचे प्रमाण
गेल्या काही दिवसांपासून मावळ तालुक्यात अपघाताचे प्रमाण वाढत असल्याचे दिसत आहे. वाहनाच्या वेगावर नियंत्रण नसल्याने अनेकदा अपघात होत असल्याच्या घटना समोर आल्या आहेत. शनिवारी झालेल्या अपघातात एका गाडीवर चौघेजण होते. याच दुचाकीला कंटेनरने जोरदार धडक दिल्याने गाडीवरील दोघांचा मृत्यू झाला आहे.
