Pune News : पुणे : पैशाच्या कारणावरून सासरच्यांनी केलेल्या शारीरिक व मानसिक छळाला कंटाळून जावयाने राहत्या घरी गळफास घेऊन आत्महत्या केल्याची घटना थेरगाव परिसरात २५ ऑगस्ट २०२३ रोजी घडली होती. याप्रकरणी दोन महिलांसह ५ जणांवर गुन्हा दाखल केला आहे.
दोन महिलांसह ५ जणांवर गुन्हा दाखल
मुकेश धनीराम शर्मा (वय -३४ रा. सध्या थेरगाव, मूळ मध्यप्रदेश) असे मयत तरुणाचे नाव आहे. याप्रकरणी मुकेश याचा भाऊ राजकुमार धनीराम शर्मा (वय ३८ रा मध्य प्रदेश) यांनी वाकड पोलीस ठाण्यात सोमवारी (ता. १६) फिर्याद दिली आहे. त्यानुसार पोलिसांनी मुकेश याच्या सासरकडील कृपाशंकर शर्मा (वय – ६०), पंकज कृपा शंकर शर्मा (वय – ३६) राघवेंद्र परमार (वय- २८) व दोन महिला सर्व रा. मध्यप्रदेश असे गुन्हा दाखल करण्यात आलेल्या सासरकडील व्यक्तींची नावे आहेत.
पोलिसांनी दिलेल्या माहितीनुसार, मुकेश याने सासर कडून काही पैसे उसने घेतले होते. ते पैसे परत द्यावे म्हणून आरोपींनी त्याच्याकडे तगादा लावला होता. यातून ते मुकेशचा शारीरिक व मानसिक छळ करत होते.
दरम्यान, या त्रासाला कंटाळून मुकेश याने थेरगाव येथील त्याच्या भाड्याच्या खोलीवर २५ ऑगस्ट रोजी रात्री पावणे नऊच्या सुमारास फॅनला वायरने गळफास घेत आत्महत्या केली. यावरून वाकड पोलिसांनी पाचही आरोपीविरोधात गुन्हा दाखल केला असून पोलीस या प्रकरणाचा पुढील तपास करत आहेत.
