जालना – लग्नाला १ महिन्याचा कालावधी शिल्लक असतानाच एका माथेफिरूने होणाऱ्या पत्नीवर बलात्कार करून खून केल्याची धक्कादायक घटना बेलोरा (ता. मंठा, जि. जालना) गावात शनिवारी (ता.१८) दुपारच्या सुमारास घडली आहे. संतप्त झालेल्या गावकऱ्यांनी माथेफिरूच्या आईवडिलांसह नातेवाइकांना घरात डांबून ठेवले होते. या घटनेमुळे संपूर्ण जालना जिल्ह्यात एकच खळबळ उडाली आहे.
दीप्ती उर्फ सपना संदीप जाधव (वय-१७, बेलोरा, ता. मंठा, जि. जालना) असे मृत तरुणीचे नाव आहे. तर सुशील सुभाष पवार (रा. वरुड, ता. मेहकर, जि.बुलढाणा) असे सावली पोलीस ठाण्यात गुन्हा दाखल झालेल्या आरोपीचे नाव आहे.
पोलिसांनी दिलेल्या माहितीनुसार, दीप्ती उर्फ सपना जाधव व सुशील पवार या दोघांचा १७ मार्च २०२३ रोजी विवाह ठरला होता. दोन्ही कुटुंबामध्ये लग्नाची लगबग सुरु होती.शनिवारी वधू आणि वर या पक्षांकडील मंडळी दुसर बीड येथे लग्नाचा बस्ता बांधण्यासाठी गेले होते. यावेळी सुशीलही बस्त्यासाठी नातेवाइकांसोबत आला होता. मात्र, तो तेथून अचानक गायब झाला.
सुशीलने थेट भावी पत्नीचे बेलोरा गाव गाठले. कुटुंबीय बस्त्यासाठी गेल्याने घरी भावी नवरी दीप्ती ही एकटीच होती. सुशीलने तिच्यावर बळजबरीने बलात्कार केला. तिने विरोध केला असता, त्याने धारदार शस्त्राने गळा चिरून खून केला. दरम्यान, घटनास्थळी गावातील लोक जमा होताच आरोपी सुशील फरार झाला.
या घटनेची माहिती मिळताच, परतूरचे उपविभागीय पोलीस अधिकारी राजू मोरे, सेवली ठाण्याचे सहायक निरीक्षक नित्यानंद उबाळे हे त्यांच्या सहकाऱ्यांसह तातडीने घटनास्थळी दाखल झाले. पोलिसांनी पंचनामा करून मृतदेह तातडीने शवविच्छेदन करण्यासाठी पाठविला आहे. पोलीस आरोपीचा शोध घेत आहेत.
दरम्यान, घटनास्थळी ग्रामस्थ आक्रमक झाल्याने तणावाचे वातावरण निर्माण झाले होते. आरोपी सुशील पवार यास अटक करण्याच्या मागणीसाठी जमावाने तरुणाच्या आईवडिलांसह नातेवाइकांना एका घरात कोंडले होते. तर या ठिकाणी कोणताही अनुचित प्रकार घडू नये याकरिता पोलिसांनी बंदोबस्त ठेवला आहे.
