पुणे : गेल्या काही दिवसांपासून पुण्यात खून, मारामाऱ्या, दरोडे, अत्याचार यासारख्या घटना घडत आहे. अशातच आता पुण्यातील धानोरीत वैमनस्यातून टोळक्याने भावंडांवर शस्त्राने सपासप वार केल्याची घटना घडली आहे.पंकज कुमार आणि साहू कुमार (दोघेही रा. मुंजाबा वस्ती, धानोरी) अशी गंभीर जखमी झालेल्यांची नावे आहेत याप्रकरणी पोलिसांनी टोळक्यावर गु्न्हा दाखल केला असून, एकाला अटक केली आहे.
याबाबत मिळालेल्या माहितीनुसार, राहुल कुमार गौतम (वय २३ रा. मुंजाबावस्ती ) यांनी याप्रकरणी विश्रांतवाडी पोलीस ठाण्यात तक्रार दिली आहे. त्या तक्रारीनुसार राजेश राधेश्याम गुप्ता (वय ४०, रा. धानोरी) याला अटक करण्यात आली आहे. त्याचे साथीदार नितीन गुप्ता (वय २५), आकाश गुप्ता (वय १९) यांच्यासह तिघांवर गुन्हा दाखल केला आहे. दरम्यान पंकजकुमार आणि आरोपी गुप्ता यांच्यात वादविवाद झाले होते. त्याचा राग गुप्ता कुटुंबीयांत होता. हा राग मनात धरून गुप्ता यांनी पंकजवर शस्त्राने वार केले. त्यावेळी पंकजचा भाऊ साहूने भांडणात मध्यस्थी केली. टोळक्याने त्याच्यावरही शस्त्राने वार केले. टोळक्याने केलेल्या हल्ल्यात पंकजकुमार व त्याचा भाऊ साहू हे गंभीर जखमी झाले.
दरम्यान या घटनेची माहिती मिळताच पोलिसांनी घटनास्थळी धाव घेतली. दोघांवर रुग्णालयात उपचार सुरू आहेत. पोलीस उपनिरीक्षक ताराचंद सुडगे तपास करत आहेत.
