संदीप टूले
केडगाव, (पुणे ) : भीमा नदीच्या पात्रात पोहण्यासाठी गेलेल्या सहा मुलांपैकी तिघेजण वाहून गेल्याची धक्कादायक घटना शनिवारी (ता. ०७) दुपारी सव्वा बारा वाजण्याच्या सुमारास हातवळण (ता. दौंड) ग्रामपंचायत हद्दीत घडली आहे. या घटनेत तीनपैकी एकाचा मृतदेह सापडला असून दोन मुले अद्याप बेपत्ता आहेत.
विशाल दिलेराम सिंग (वय-१६), निखिल नरेशसिंग कुमार (वय-१५), अमित रामेश्वर राम (वय-१६, ता. तिघेही मुळ रा. आदवपुर जि. बिजनौर) अशी या मुलांची नावे आहेत. यातील अमित राम याचा मृतदेह मिळाला असून आणखी दोघांचा मृतदेह शोधण्याचे काम सुरु आहे.
मिळालेल्या माहितीनुसार, हातवळण येथील वसंत विठठल फडके यांच्या गुऱ्हाळावर काम करणाऱ्या मजूर दिलेराम भस्सु सिंग (वय ४५) यांचा मुलगा विशाल, भाचा निखिल, मेव्हणीचा मुलगा अमित, देव, निपिलकुमार व निरजकुमार असे सहा जण शनिवारी दुपारी सव्वा बारा वाजण्याच्या सुमारास हातवळण येथील भीमा नदीच्या पात्रात पोहण्यासाठी गेले होते.
पोहण्यासाठी यातील एकजण अगोदर नदीपात्रात उतरला होता. त्यानंतर तो बुडू लागला म्हणून अन्य दोन जणांनी पाण्यात उड्या मारून त्याला वाचवण्याचा प्रयत्न केला. मात्र, त्यानंतर हे तिघेही पाण्यात वाहून गेले. घटनेची माहिती मिळताच भिमा नदीच्या पात्रात यवत व पाटस पोलिसांनी घटनास्थळी धाव घेतली. पोलिसांनी मासेमारी करणाऱ्या मच्छीमारांच्या होडीतून व ग्रामस्थांच्या मदतीने या मुलांच्या मृतदेह शोध कार्य सुरू केले.
दरम्यान, या शोधकार्यात अमित याचा मृतदेह आढळून आला. त्याचा मृतदेह पाण्याच्या बाहेर काढुन मांडवगण फराटा येथील प्राथमिक आरोग्य केंद्रात उपचारासाठी दाखल केले. मात्र डॉक्टरांनी अमित याचा उपचारापुर्वी मृत झाल्याचे सांगितले. तर विशाल व निखिल हे अद्याप मिळून आले नाहीत. पोलीस मच्छीमारांच्या मदतीने भीमा नदीच्या पात्रात त्यांचा शोध घेत आहेत.
