Accident News : हिंगोली : बुलढाणा जिल्ह्यातील सिंदखेडराजा नजीक खासगी बसला भीषण अपघात झाला. या अपघातात २५ प्रवाशांचा होरपळून मृत्यू झाला. नागपुरवरुन विदर्भ ट्रॅव्हल्सची ही बस समृद्धी महामार्गावरुन पुण्याकडे येत होती. चालकाला डुलकी लागल्याने वेगात असलेली बस एका लोखंडी पोलवर आदळली. यामुळे चालकाचे बसवरील नियंत्रण सुटले आणि बस उलटली. बसने पेट घेतला आणि साखर झोपेत असलेल्या २५ प्रवाशांचा होरपळून मृत्यू झाला. समृद्धी महामार्गावर वारंवार अपघात घडत आहेत. त्यामुळे या महामार्गावरून प्रवास करणं जीवघेणं ठरत असल्याने चिंता व्यक्त केली जात आहे. तसेच या महामार्गावरील वेगमर्यादेवरून सत्ताधाऱ्यांवर विरोधकांनी टीकाही केली आहे. या पार्श्वभूमीवर हिंगोली आरटीओने मोठा निर्णय घेतला आहे. या निर्णयाची अंमलबजावणी सुरू झाली आहे.(Accdient News)
लांब पल्ल्याच्या खासगी ट्रॅव्हल्सची तपासणी केली जात आहे.
समृद्धी महामार्गावर झालेल्या भीषण अपघातानंतर ट्रॅव्हलच्या फिटनेसवर प्रश्नचिन्ह उपस्थित केले जात आहे. हिंगोलीत आज सकाळपासूनच उप प्रादेशिक परिवहन कार्यालयातील अधिकाऱ्यांनी औंढा नागनाथ-हिंगोली या मार्गावर पुण्यावरून येणाऱ्या वाहनांची तपासणी सुरू केली आहे. तसेच लांब पल्ल्याच्या खासगी ट्रॅव्हल्सची तपासणी केली जात आहे.(Accdient News)
दरम्यान, वाहनांची तपासणी करत असताना सुमारे १० ते १२ ट्रॅव्हल्सने नियम मोडल्याचे आढळून आल्यामुळे या ट्रॅव्हल्सवर दंडात्मक कारवाई करून समज देण्यात आली. (Accident News) नियमांचे पालन न करणाऱ्या ट्रॅव्हल्सला रस्त्यावरून फिरू देणार नसल्याचे उप प्रादेशिक परिवहन अधिकारी जगदीश माने यांनी सांगितले. हिंगोली आरटीने हा मोठा निर्णय घेतल्याने आता वेगाने आणि नियमबाह्य पद्धतीने वाहने चालवणाऱ्या चालकांना चाप बसणार आहे.
अनेक वाहनांमध्ये अग्निशमन यंत्रे नसल्याचे या तपासणीत निदर्शनास आले. एमर्जन्सी डोअरजवळ सीट ठेवल्यामुळे या वाहनचालकांवर दंडात्मक कारवाई करून त्यांना समजही देण्यात आली आहे. तसेच अवैध वाहतूक करणाऱ्यांना आणि वाजवीपेक्षा अधिक प्रवाशांची वाहतूक करणाऱ्यांवरही कारवाई करण्यात आली. एका पथकाने इंग्लिश स्कूलच्या बसवरही कारवाई केली. हिंगोलीनंतर आता इतर जिल्ह्यातही आरटीओ सक्रिय होण्याची शक्यता आहे.(Accident News)
या अपघातात बसचा चालक बचावला आहे. चालक शेख दानिश वर सदोष मनुष्य वधाचा गुन्हा दाखल करण्यात आला आहे, प्रथम दर्शनी चालकाचीच चूक असल्याने सिंदखेडराजा पोलिस स्टेशनमध्ये हा गुन्हा दाखल करण्यात असून, चालक दानिश याला पोलिसांनी ताब्यात घेतले आहे.(Accident News)
