लोणी काळभोर : पुणे-नगर महामार्गावर उरुळी कांचन (ता. हवेली) येथील ट्रकचालकाने कोरेगाव भीमा येथील एस.टी. स्टॅंडसमोर दुचाकीला उडविल्याची धक्कादायक घटना शुक्रवारी (ता.१०) दुपारी अडीच वाजण्याच्या सुमारास घडली आहे. या अपघातात एकाचा जागीच मृत्यू झाला आहे. तर एकजण गंभीर जखमी झाला आहे.
निखिल जिवराम रावत असे मृत्यू झालेल्या व्यक्तीचे नाव आहे. याप्रकरणी प्रशांत शिवाजी जाधव यांनी शिक्रापूर पोलीस ठाण्यात फिर्याद दिली. त्यानुसार ट्रकचालक प्रफुल्ल चंद्रकांत निकाळजे (रा. खेडेकर मळा, उरुळी कांचन) याच्यावर गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी प्रशांत जाधव व त्याचा मित्र निखिल जिवराम रावत हे दुचाकी (. के ए. ५१ एच एच ८२२६) वरून पुण्याकडून अहमदनगरच्या दिशेने चालले होते. तेव्हा त्यांच्या दुचाकीला कोरेगाव भीमा येथे पाठीमागून येणाऱ्या ट्रकने (क्र. एम एच १२ के पी ४९९८) धडक दिली.
या अपघातात दोघे दुचाकीस्वार खाली पडले. तेव्हा ट्रकचालकाने गाडी थांबविन्याऐवजी ट्रक तसाच पुढे नेल्याने ट्रक निखिलच्या अंगावरून गेला. या अपघातात निखिलचा जागीच मृत्यू झाला. तर फिर्यादी प्रशांत हे गंभीर जखमी झाले आहे.
दरम्यान, याप्रकरणी प्रशांत जाधव यांनी शिक्रापूर पोलीस ठाण्यात फिर्याद दिली. त्यानुसार ट्रकचालक प्रफुल्ल निकाळजे याच्यावर गुन्हा दाखल करण्यात आला आहे. पुढील तपास सहाय्यक पोलीस निरिक्षक अविनाश थोरात करीत आहेत.
पुणे-नगर महामार्गावर मागील दोन महिन्यांत १२ जणांचा मृत्यू…
पुणे-नगर महामार्गावर मागील दोन महिन्यांत वाघोली ते शिक्रापूरदरम्यान १२ जणांचा मृत्यू झाला आहे. रस्त्यावर वाहनांचे वेग प्रचंड वाढल्याने अनेक कुटुंबांचा आधार गेला असल्याने सार्वजनिक बांधकाम विभागापुढे रस्त्यावरील वाहनांचे वेग कमी करण्याचे एक आव्हान उभे आहे.
