लोणावळा : लोणावळ्यात पोलीस कर्मचाऱ्याला गुन्हेगाराच्या टोळीकडून बेदम मारहाण केल्याची धक्कादायक घटना ओकळाईवाडी परिसरात नुकतीच घडली. या मारहाणी पोलीस कर्मचारी गंभीर जखमी झाले आहेत. याप्रकरणी लोणावळा ग्रामीण पोलीस ठाण्यात ८ जणांवर गुन्हा दाखल करण्यात आला आहे.
पोलीस नाईक अजिज जब्बार मेस्त्री हे जखमी झालेल्या पोलिसाचे नाव आहे. तर अतुल गौड, दिनेश मारवाडी, आकाश चोर, विनायक शिंदे, प्रशांत शिंदे, वैभव साठे यांच्यासह आठ जणांच्या विरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, अतुल गौड याच्यावर लोणावळा शहर पोलीस ठाण्यात मारहाणीचा गुन्हा दाखल होता. दाखल गुन्ह्यात गौड याला तपासासाठी पोलीस ठाण्यात हजर राहण्यासाठी पोलीस नाईक अजिज मेस्त्री यांनी सांगितले होते.
दरम्यान, हजर राहण्यास सांगितल्याच्या रागातून आरोपींनी पोलीस नाईक अजिज मेस्त्री यांना लोणावळा परिसरातील ओकळाईवाडी परिसरात गाठले. आरोपी विनायक शिंदे यांनी मेस्त्री यांच्या डोक्यात दगड मारला. तर वैभव साठे याने गजाने मारहाण केली. त्यानंतर आरोपी घटनास्थळावरून फरार झाले.
याप्रकरणी अतुल गौड, दिनेश मारवाडी, आकाश चोर,विनायक शिंदे, प्रशांत शिंदे, वैभव साठे यांच्यासह आठ जणांच्या विरुद्ध गुन्हा दाखल करण्यात आला आहे. पोलीस आरोपींच्या मागावर आहेत. पुढील तपास लोणावळा ग्रामीण पोलीस ठाण्याचे सहायक पोलीस निरीक्षक कारंडे करत आहेत.
