पुणे : येरवडा येथील भगवा झेंडा चौक ते सेवक चौकादरम्यान परिसरात दहशत निर्माण करण्यासाठी टोळक्याने रस्त्यावर पार्क केलेल्या वाहनांची तोडफोड केल्याची घटना बुधवारी (ता. ०१) मध्यरात्री दोन वाजण्याच्या सुमारास घडली आहे. याप्रकरणी चारजणांना येरवडा पोलिसांनी बेड्या ठोकल्या आहेत. तर आणखी तिघेजण फरार आहेत.
सिद्धेश शेंडगे, तेजस शेंडगे (रा. लक्ष्मीनगर, येरवडा), करण उर्फ चिक्या अडागळे, मोईन शेख अशी अटक केलेल्यांची नावे आहेत. आदिसिंग आणि पाप्यासिंग फरार असून पोलीस त्यांचा शोध घेत आहेत. याप्रकरणी भरत चंद्रकांत वाजाणी (वय – ४८ रा. लक्ष्मीनगर, येरवडा) यांनी येरवडा पोलिस ठाण्यात तक्रार दिली आहे.
पोलिसांनी दिलेल्या माहितीनुसार, येरवडा परिसरात दहशत माजविणसाठी टोळक्याने रस्त्यावरील वाहनांची तोडफोड केली आहे. तोडफोडीत रिक्षा, दुचाकी, स्कुलव्हॅनचा समावेश आहे.आरोपींनी फिर्यादी यांच्या स्कुलव्हॅन च्या काचेवर लाकडी बांबु व दांडक्याने मारुन तोडफोड केली.
दरम्यान, याप्रकरणी पोलिसांनी चौघांना अटक केली आहे. त्यांच्या फरार साथीदारांचा शोध घेतला जात आहे. ही कामगिरी पोलीस निरीक्षक उत्तम चक्रे, सहायक पोलीस निरीक्षक प्रमोद खटके यांच्या मार्गदर्शनाखाली पथकाने केली.
