Surat Building Collapsed : गुजरातच्या सुरत शहरातून एक धक्कदायक घटना समोर आली आहे. शहरातील पाल भागात सहा मजली इमारत कोसळल्याची घटना घडली आहे. हि घटना शनिवारी (दि. ०६) पाल भागात घडली. या दुर्घटनेत आतापर्यंत ७ जणांचा मृत्यू झाल्याची प्राथमिक माहिती मिळत आहे. अनेक नागरिक अजूनही ढिगाऱ्याखाली दबल्याची भीती व्यक्त केली जात आहे. घटनास्थळी कालपासून एनडीआरएफ आणि एसडीआरएफचे पथक बचाव कार्य करत आहेत.
दरम्यान, सुरतचे मुख्य अग्निशमन अधिकारी बसंत पारीक यांनी सांगितले की, रात्रभर चाललेल्या शोध मोहिमेत ७ मृतदेह हाती लागले आहेत. पोलिसांनी सांगितले की, बचावकार्य सुरू असून अजूनही बरेच लोक आत अडकले असण्याची शक्यता आहे.
सुरतचे पोलीस आयुक्त अनुपम गेहलोत म्हणाले, ‘एसडीआरएफ आणि एनडीआरएफच्या टीम अजूनही मदत आणि बचाव कार्य करत आहेत. इमारतीतील ५ फ्लॅटमध्ये लोक राहत होते. अनेक लोक ढिगा-याखाली अडकल्याची भीती आहे. येथील अनेक रहिवासी लोक परिसरातील कारखान्यांमध्ये काम करत होते. हे सर्वजण भाडे कराराने राहत होते. ही जुनी इमारत असल्यामुळे ती अचानक कोसळली असल्याची शक्यता गेहलोत यांनी वर्तवली आहे.
पुढे बोलताना म्हणाले कि, पाच ते सात कुटुंब जीव धोक्यात घालून येथे राहत होती. इमारत कोसळल्यानंतर जेव्हा बचावकार्य सुरू केले तेव्हा आम्हाला अडकलेल्या लोकांच्या ओरडण्याचा आवाज आला. आम्ही एका महिलेला ढिगाऱ्यातून बाहेर काढले आणि तिला रुग्णालयात दाखल केले. त्यानंतर एका व्यक्तीचा मृतदेह बाहेर काढण्यात आला. या प्रकरणी गुन्हा दाखल करण्यात आला असल्याचे गेहलोत यांनी सांगितले.
