मुंबई : सध्या वंचित बहुजन आघाडीमध्ये असणारे वसंत मोरे ठाकरे गटात प्रवेश करणार असल्याचे ठाकरे गटाचे खासदार संजय राऊत यांनी यासंदर्भात सकाळी पत्रकारांशी बोलताना सांगितलं आहे. त्यामुळे राजकीय वर्तुळामध्ये एकच चर्चा सुरु आहे.
वसंत मोरे आज गुरुवार (दि.04) रोजी ठाकरे गटाचे प्रमुख उद्धव ठाकरे यांची भेट घेणार आहे. मातोश्री वर दुपारी साडेबारा वाजता वसंत मोरे उद्धव ठाकरेंना भेटण्यासाठी येणार असल्याची माहिती समोर येत आहे. मातोश्रीवर उद्धव ठाकरेंना भेटण्यासाठी वसंत मोरे यांच्यासोबत खासदार संजय राऊत आणि शिवसेना ठाकरे गटाचे उपनेते साजन पाचपुते हेसुद्धा येणार आहेत.
लोकसभेच्या निवडणुकीच्या वेळेस सुद्धा आपल्याला उमेदवारी मिळावी यासाठी वसंत मोरे यांनी संजय राऊत यांची भेट घेतली होती. मात्र काँग्रेसने महाविकास आघाडीमध्ये उमेदवार दिल्याने वसंत मोरे यांना उमेदवारी मिळू शकली नाही. त्यामुळे वंचित बहुजन आघाडीकडून त्यांनी लोकसभा निवडणूक लढवली होती. आगामी विधानसभा निवडणुकीचा विचार करता वसंत मोरे शिवसेना ठाकरे गटात प्रवेश करण्याची शक्यता आहे.
वसंत मोरे यांना पुण्यातून वंचिक बहुजन आघाडीने पाठिंबा दिला होता. मात्र, तरी त्यांचा पराभव झाला होता. आता ते ठाकरे गटात प्रवेश करण्याची दाट शक्यता आहे.
