पुणे : ताम्हिणी परिसरातील प्लस व्हॅलीमधील मिल्की बार धबधबा येथे पाण्याचा अंदाज न आल्याने एक पर्यटक वाहून गेल्याची धक्कादायक माहिती समोर येत आहे. हा तरुण आपल्या जिममधील 32 जणांच्या ग्रुपसोबत ताम्हिणी घाटात फिरण्यासाठी गेला होता. स्वप्नील धावडे असं या तरुणाचं नाव आहे.
या घटनेसंदर्भात मिळालेल्या माहितीनुसार, ताम्हिणी घाटात गेलेल्या स्वप्नील धावडे या पर्यटकाने पाण्यात उडी मारल्यानंतर त्या मुलाला पाण्याचा अंदाज आला नसल्यामुळे तो जोरदार प्रवाहात बेपत्ता झाला. हा ग्रुप शनिवारी वीकेंडला सहलीसाठी मुळशी तालुक्यातील ताम्हिणी घाटातील प्लस व्हॅली येथे गेला होता. व्हायरल झालेल्या व्हिडिओमध्ये स्वप्नील धावडे उंचावरून धबधब्यात उडी मारताना दिसत आहे.
गेल्या काही दिवसांपासून सुरु असलेल्या मुसळधार पावसामुळे ताम्हिणी घाटातील प्लस व्हॅलीच्या कुंडांमध्ये पाण्याचा प्रवाह वाढला आहे. पौड पोलिस, ताम्हिणी वनविभाग, मुळशी आपत्ती व्यवस्थापन समिती, रोहा-रायगड रेस्क्यू टीम, शिवदुर्ग टीम लोणावळाने प्लस व्हॅलीच्या वरील बाजूच्या पाण्याच्या दोन कुंडांमध्ये आणि आसपासच्या परिसरात स्वप्नील धावडे याचा शोध घेतला. मात्र, या टीमला कोठेही स्वप्नील धावळे सापडला नाही.
