पुणे : पुण्यात गेल्या काही दिवसांपासून पोर्शे अपघातावर अनेक चर्चा सुरु असतानाच आता पुण्यात आणखी एक मोठा अपघात झाला आहे. नगर रस्त्यावरून पुणे स्टेशनकडे दुचाकीला भरधाव ट्रकने धडक दिल्याने दोन विद्यार्थ्यांचा मृत्यू झाल्याची धक्कादायक घडना घडली आहे. हा अपघात सोमवारी रात्री साडेदहाच्या सुमारास घडली. यात एकाचा जागीच मृत्यू झाला. तर दुसऱ्याचा ससून रुग्णालयात उपचरादरम्यान मृत्यू झाल्याची माहिती दिली.
मालवाहतूक ट्रक वाघोलीतून पुण्याच्या दिशेने येत होता यावेळी खराडीतील जकात नाका चौकात हा अपघात घडला आहे. या प्रकरणी ट्रक ड्रायव्हरला ताब्यात घेण्यात आले आहे, अशी माहिती पोलिसांनी दिली आहे. श्यामबाबू रामफळ गौतम असे चालकाचे नाव आहे.
आदील शेख आणि पाहद शेख दोघेही राहणार लातूर अशी मृत्यू झालेल्या विद्यार्थ्यांची नावे आहेत. तसेच हे रायसोनी कॉलेजचे विद्यार्थी आहेत. यातील आदिलचा जागीच मृत्यू झाला. तर पाहदचा मृत्यू ससून रुग्णालयात झाला. असे अपघातानंतर या दोघांना मदत करणाऱ्या खांदवे नगर येथील मोशिन पठाण याने सांगितले.
यावेळी अपघाताबद्द्ल बोलताना मोशीनने सांगितले की, नगर रस्त्यावरील जकातनाका येथे एका ट्रकने दोन विदयार्थ्यांना उडवले. यावेळी चालकाने मद्यप्राशन केले होते. अपघातानंतर चालकाने दुचाकी 800 मीटर फरफटत नेली.
आदिल आणि पाहद यांचा मित्र अफान शेख याला गावी जायचे होते. त्यामुळे ते दोघे त्याला पुणे स्टेशनला सोडवायला निघाले होते. यात अफान शेख हा गंभीर जखमी झाला आहे. त्याच्यावर उपचार सुरू आहेत. याप्रकरणी विमान नगर पोलीसांकडे तक्रार केली आहे. असे मोशीनने सांगितले.
यावेळी पोलीसांनी दिलेल्या माहितीनुसार, गौतम हा त्याचा ट्रक (MH 12 VF 6441) घेऊन चंदन नगरच्या दिशेने जात होता. जकात नाका येथे सिग्नल वर थांबलेल्या मोटारसायकलला त्याने मागून जोरात धडक दिली. त्यामध्ये मोटारसायकल वरील असणारे तीन जण फरफटत गेली. पुढील तपास पोलीस करत आहेत.
